MP inthlan atana hman tur electoral roll buaipui tan

Lok Sabha MP inthlan neih huna hman tur electoral roll siamthat tumnaah Inrinni khan draft electoral roll tihchhuah a ni a, Mizoramah vote nei mi nuai 8.5 chuang an awm.
Mizoram district 11 awmah draft electoral roll tihchhuahah hian vote nei 852087 an awm a. Heng zinga 439024 chu hmeichhia niin, 413063 chu mipa an ni. Mipa voter aiin hmeichhe voter 25961-in an tam zawk.
Mizorama vote nei, hnathawhna avanga state pawna awm – service voters 4980 an awm a, an zinga 4890 chu mipa, hmeichhia 90 an ni.
Draft electoral roll-ah hian Aizawl district-ah vote nei tam berin 286813 an awm a; Lunglei district-in dawtin 100122 a awm. Vote tlemna ber Hnahthial district-ah vote nei 16261 an awm a, a dawttu Khawzawl district-ah voter 17503 a awm.
Draft electoral roll tihchhuah atang hian, kumin January 1-a kum 18 tling chinte tan electoral roll-a inthunna tur hun hawn a ni a, January 22 thleng hming thun theih a ni. Mahni bialtu ERO/AERO/BLO hnenah electoral roll-a inthunluh dilna thehluh theih a ni a. Dilna hi https://voters.eci.gov.in leh Voter Helpline App atangin thehluh theih a ni bawk.