Mpox laka la himah inngai

Tunlaiin khawvel ram hrang hrangah mpox a darh a, WHO pawhin he hri hi a do mek. Mizoram chu he natna lakah hian a la himah ngaih a ni.
Integrated Disease Surveillance Programme (IDSP) hotute’n Mizoramah mpox hriatchhuah a la nih loh thu an sawi a,a dona leh invenna lamah theihtawp chhuah a nih thu an sawi.
Tun hnaiah district hmunpui pakhatah mpox vei an awm tiin social media lamah thu a darh a, hei hi a lo dik lo tih finfiah a ni.
Youtube lamah he thu hi a darh a, health department lamin an han chhui chiang a, mpox a lo ni lo, chickenpox zawk a lo ni tih finfiah a ni.
IDSP state nodal officer Dr Vanlalrengpuia Chinzah chuan Mizoramah mpox hmuh a la nih loh thu a sawi a, sorkar laipui dun danin a invenna lamah theihtawp chhuah a ni tih a sawi.
India rama he hri vei hi pakhat hriat a ni tawh a, khawvel ram thenkhatah he hri hi hmuh a nih khan India ramah pawh international airport leh international seaport-ahte khualzinte endik zel an ni. India sorkar hian state lamina an tih tur a duang nghal a, Mizoramah pawh hei hi zawm ve nghal a ni.
Mizoramah chuan National Institute of Virology, Pune lamin nikumah lamah daih tawh khan ZMC chu sentinel surveillance centre atan a ruat tawh a, ZMC hi hemi atan hian tihfel a ni. ZMC-ah leh Lunglei Civil Hospital-ahte he natna kai leh kai loh endikna khawl a awm bawk.
Tun hnaiah tunlaia khawvel ram thenkhata leng H1N1 pawh Mizoramah hmuh a ni a, mahse vanneihthlak takin September thla tawp lama Tlungvel leh Baktawng Tlangnuam-a finfiah a nih hnuah H1N1 hi hmuh a ni rih lo.