MPSC chhanchhuah hnatlang

Mizoram Public Service Commission (MPSC) hnuaia exam hrang hranga zirlaite leh Mizo thalai hna zawng mekten harsatna an tawh thin chungchangah Mizo Zirlai Pawl bultumin MPSC kaltlanga hna zawng thinte nen August 6&7 hian ‘MPSC siamthat hnatlang’ an ko.
MZP Gen. Hqrs. in MPSC hnuaia exam hrang hrangah zirlaite leh Mizo thalai hna zawng mekten harsatna an tawh thin chungchangah aspirant hrang hrang nena sawiho a nih hnu in August 6&7 hian MPSC siamthat hnatlang a ko a, Mizo thalai hnazawng mek, MPSC-a harsatna tawk mek leh MPSC siamthat duhtute tel turin an sawm tih an sawi.
Thil phut lawk an nei a. One Time Registration (OTR) tih tawp nise, need based-in specific application form siam ni rawh se; OTR-a document upload kim loh avanga hnawl zawng zawng chu offline-a document thehluhna hun siamsak rawh se; written exam-a tling tawh, OTR-a document upload kim loh avanga hnawl tawh tan offline-a document thehluhna hun siam sak rawh se; MPSC kalphung siamthat vek ni se, sawrkarin Reform Committee/ Commission din rawh se,’ tihte a ni.
MZP hmalakna hian awmzia a neilo a nih chuan, zirlai hna zawng mekten an dikna chanvo an hmuh theihna tur leh MPSC zahawmna humhim a nih theihna turin a tawp thlengin ke an pen zel dawn tih a sawi a ni.
MZP president Dr C Lalremruata chuan, siamthat hnatlangah hian MPSC pisa kawtah tharum thawh loa lungawilohna lantir an tum tih a sawi a ni.