Ruah a sur tluang e

Tunlai chu ruah a sur tluk tluk mai. Ni tin a sur a, Nilaini phei kha chuan a bei nileng. Ruah sur hun a ni a, mak han tih tur a ni lo ang.
Ruah a sur ziah na a, a tam thu-ah chuan ruah hi a tam lem lo. Kuminah tam tham taka sur bur bur a la nei lo a, tam vak lovin a tla deuh reng a ni mah zawk.
Tun hnaiah ni 37 chhung ni tin ruah a sur a, June ni 24 atanga July ni 30 thleng khan ni tin a sur. Nileng lenga sur chu a ni lo a, mahse ni khatah tlem tal a tla ziah. July ni 31-ah khan a sur lo a, August ni 1-ah a sur lo leh bawk. Mahse August ni 2 atangin ni tin a la sur. Tun hnai ni 43 chhungin ni 41 chu ruah a sur tihna a ni.
Ni 43 chhungin ni 41 chu ruah a sur han tih hian ruah a tam hmel viau a, a tam lem lo. Ni engemaw zatah hi chuan a hmingin a tla, rei lo te a sur tih vel a ni. Sawi tawh angin, kuminah tam tlawrh tlawrha ruah a sur ni a la awm lo.
State Meteorological Centre-in an chhinchhiah danin, kumin June thlaa Aizawla ruah tam ber ni chu ni 5 kha a ni a, June ni 5-ah khan mm 57.2 a sur. Hei hi June thlaah chauh ni lovin kumina ruah a tam ber ni a la ni.
Ruah tui mm 57.2 hi a tam tho na a, Mizoramah hei aia tam hi a sur ngun. Ni khata mm 100 chuang a sur ni a awm fo a, 2024 May ni 28-ah phei kha chuan mm 205 lai mai a sur.
Kuminah June ni 24 hnuah ni 41 chhung ruah a sur a, mahse a tam ber ni, June ni 5 (mm 57.2) tih lohvah July ni 21 kha a tam ni a ni leh a, mm 46.6 a ni. Mizorama ruah tam laia surah chuan a tam tia sawi tur khawp a ni lo. August-ah pawh ni 2 atanga ni 5 thlengin ni tin a la sur a, ni 2-ah mm 1 chauh, ni 3 leh ni 4-ah pawh mm 4.2 chauh a ni. Ni 5-ah mm 46.6 a ni ta dawrh a, chu pawh chu a tam han tih hluah tur chu a ni lo.