MPSC sawifiahna pawmawm ti lo Tunkar chhunga chairman ban phut

Mizoram Public Service Commission (MPSC) in Combined Competitive Examinations a kalpui dana thil fel tawk lo awm nia sawitu Mizo Zirlai Pawl chuan MPSC-in hemi chungchang a sawifiahna chu pawmawm a ti loa, he thila a mawhphurtu lu bera an ngaih Commission chairman chu tunkar chhung ngeia bang turin an phut nawn.
MZP Gen. Hqrs. president H Lalthianghlima chuan, MPSC-in a thil tih dik loh hi sawimam tum leh evaluator-te tihsuala puh reng loin, an mawhah la se, MPSC zahawmna humhim a nih zel a, zirlai hna zawng mekten an rinna an nghah zel theih nan chairman hi tun kar chhungin bang se an duh a. An ngennain awmzia a neih loh chuan, chairman ban a nih ngei theih nan hma an la dawn tih a sawi.
Exam answer paper-te hi RTI Act hmanga dilchhuah remtih thin a nih laiin, kuminah chuan an remti ta lo a. A hnuah certified copy pe chhuak loin ‘inspection without photograph’ an phal a. Nawrna avangin a hnuah phone-a thla lak an phal leh chauh tih sawiin, “MPSC hian an thil tih dik tawk lo avangin, hlauh an neih vang a ni angem, tih zawhna a awm phah a. Hetiang sulhnu mak leh sawi neuh neuh awm hi MZP chuan pawi a ti a. Exam beitu lungawilohna neite an dawnsawn danah pawh an inenfiah a ngai hlein kan hria,” a ti.
MPSC-in heng thil siamthat tuma hma late chu “tlin loh vanga rilru na thil tih” ang lekah a chhuah fo mai tih MZP president hian sawiin, dik lo thei lo, tisual ngai lo leh sawisel thiang lo anga an inchhal chung a, case an nei fo chu inenfiah se an duh tih a sawi.
Combined Competitive Examinations hnuhnung berah thil dik tawkloa hmalakna a awm ngeiin MZP chuan a hria a, mains exam paper thenkhatah correcting fluid hman niin, mark pek tawh sa thaichhiatna leh mark tihdanglamna hnuhma chu hmun hnih-khat mai ni lo, hmun tam takah a awm tih a sawi bawk.
Zawhna chhangin MZP hruaitute chuan, exam hniam zawka anser paper endiknaah pawh thai hnawk awm lo tur leh correcting fluid hman ngai lo tura an inchah lawm lawm tawh lai a, hetiang hna sang tak lakna tura evaluator atana MPSC-in a rawihte hrilh an ni lo chu awih harsa an tih thu an sawi a. Hna lak dana sawiselna hi MPSC chhung atang pawhin hrilhtu an awm tih an sawi.