MRB-in Manager Conclave nei Mizoten MRB kan nei hi a hlu

MRB-in Manager Conclave nei
Mizoten MRB kan nei hi a hlu
– Chief minister
Mizoram Rural Bank Branch Manager Conclave 2026 chu Inrinni khan Aizawlah neih a ni a, branch tithate lawmman sem a ni.
Hmanpuitu chief minister Lalduhoma chuan, India rama regional rural bank thangduang tak, Mizote ta Mizoram Rural Bank kan nei chu a hlu hle, tiin, hma an sawnna chanchin chuan a ti lawm thin tih a sawi. Credit- Deposit Ratio nei tha ber pawl bank a ni reng thei chu chhuanawm a tih thu a sawi a. Bank-te CD ratio a san hian an sum dawn khawm mipui tan an pe chhuak tam tihna a ni a. Ram hmasawnna atan chu chu a pawimawh tih a sawi a ni.
Bank manager-te chu sawrkar policy a taka chantirtu an nihna chen a awm tih sawiin, sawrkar flagship programme – Bana Kaihah phei chuan an ni lehzual a. Ram hmasawnna tura tih theih an ngah hle a, sawrkar pawhin a beisei sang tih a sawi.
“Kan ramah financial literacy sang zawk mamawhna a nasa a, thingtlang lama mipuiin bank an mamawh em em a. An tana dawr awlsam leh zangkhai neih a tul. Heng kan mipui mamawh phuhru thei ber tur chu MRB hi in ni. In lo tih tawh tha taka chhunzawm zel chungin, zau zawka hma la zel turin ka ngen che u. Nikum chhunga hmasawnna ropui tak in thawhchhuahah ka lawmpui che u a. In tan sawrkar a ding reng tih hre chungin hmasawn zel tum ang u,” chief minister hian a ti.
Conclave hi State Bank of India Corporate Centre general manager (A&S) Prakash Chandra Baror pawhin a hmanpui a. MRB chairman Sheryl L Vanchhong chuan sawrkar kum kalta chhunga hma an sawnna a sawizau bawk.
Mizoram Rural Bank hi 1983 September 27-ah a ding tan a, sawrkar laipuiin share zaa 15, sponsor bank SBI-in zaa 35 leh Mizoram sawrkarin zaa 50 share an nei. Regional office pahnih bakah branch 106 an nei tawh a, chu’ng zinga 60 chu thingtlanga awm an ni. Thawktu 491 an awm mek.
Sawrkar kum liamtaah khan deposit cheng vaibelchhe 6526.10 an hmu a, an target vbch. 682.11 a khumin, an thanna rate chu 11.26 a ni. An loan pek chhuah zat chu vbch. 4129.98 a tling a, an tlin zat tura an bituk (advances target) vbch. 300 chuangin an khum. Nikum chhunga an hlep vbch. 152.27 a ni a, an CD ratio hi 63.28 niin, Mizorama inbun bank hoah an sang ber.
Kum kalta chhung khan an kum khat sum chevel hi cheng vbch. 10656. 08 a tling a. Chawhrualin branch tinin vbch. 100 kalpui vek anga ngaih theih a ni. Hetiang nei thei regional rural bank hi India ramah pali chauh an la awm. An sum chevel zawng zawng zaa 97.36 hi digital financial transaction-in an kalpui tawh a, India hmarchhakah an sang ber a, India ram huap chuan pahnihna an ni.
Mizoram sawrkar flagship programme – Bana Kaihah loan 279 an pe chhuak tawh a. Bana Kaih hnuaia partner bank-te hnena dilna lut za zela 59.35 hi MRB-ah a lut mek a ni.