MUHCS inziahluh hun May 15 thleng

Mizoram Universal Health Care Scheme-a inziaklut duh tana inziahluh hun chu kumin May 15 thleng pawhsei a ni.
MUHCS 2.0 a inziahluh hun hi vawiin – April 15 thleng atan ruat lawk a lo ni tawh a. Mipui inziaklut duh, la inziaklut thei lo an la tam a, mipui ngenna avangin inziahluh hun hi pawhsei tum a nih thu dawn a ni.
Thudawn danin MUHCS 2.0 a inziahluh theih hun hi sawrkar chuan May 15 thlenga pawhsei a tum a. AMC inthlanpui neih turah model code of conduct kalh a nih theih tawh avangin hriattirna tichhuak tur hian State Election Commission (SEC) ah dilna a thlen. SEC hian a remtih thu a sawi rualin, AMC inthlan turah party bil hamthatna atana hman zui a remti lo tih a sawi a ni.
Mizoram State Health Care Society chhinchhiah chinah MUHCS 2.0 a inziaklut hi, online hmangin mi 29472 an ni tawh a, offline-a inziaklut zat erawh hriatchian theih a la ni lo. NIkum nena khaikhinin tun thlenga inziaklut tawh zat hi mi 9000 chuangin an tam tawh zawk a ni.