Mumbai veng changkang leh New York-a in man inang reng tawh

Mumbai veng changkang leh New York-a in man inang reng tawh
Mumbai khawpuia in (apartment) changkang man chu New York-a mite nen a inang reng tawh niin report tharah tar lan a ni a. India rama sumdawnna khawpuiah hian hausakna leh thil neih man a pung nasa hle tih tar langtu nia ngaih a ni.
Mumbai-a veng changkang, Worli-ah chuan apartment thenkhat man chu feet khat bial Rs. 1,00,000 ($1,109) a kai hial tawh a. New York-a Lower Manhattan-a mi aiin a hniam bik tawh chuang lo niin Indian real estate consultant Anarock Group leh wealth management firm 360 One Wealth-in report an siamah an tar lang.
In man sang ta hian Indian-te hausakna hi tual chhungah an hmang nasain an duh hmun bik lai, Worli ang chi-a hmunhma man pawh a tisang chak ta em em niin an sawi a. Anarock Chairman Anuj Puri-a chuan India-a in changkang ber ber 40% vel awmna, Worli-ah hian ‘a changkang lehzual’ chin chi Rs. vaibelchhe 40 chuang mante a nih hlawm thu a sawi.
Report an siamah hian kum thum liam ta chhung khan in inleisak tura inremna siam 20 chuang chu Rs. vaibelchhe 100 chuanga siam a nih hial thu a tar lang bawk.
Worli district-ah hian mihring chenna hmun sq feet nuai 40 atanga 50 inkar vel awmin sak mek a awm bawk a. Sak mekte nen luah theih vek a nih chuan Rs. vaibelchhe 19,000 man daih a ni dawn nia tar lan a ni.
Worli chhung leh a chhehvelah hian kum 2023 atang khan ram inleisakna pawh Rs. vaibelchhe 7,600 man dawn dawn a kai tan thu leh Rs. vaibelchhe 36,000 man vel a vaiin ram hi a nih tawh tur thu an tar lang bawk.