Myanmar inkahnaa hliam tuarte Aizawlah enkawl

Myanmar an buai a, sorkar sipai leh sipai sorkar paih tuma beitute an indo mek. Tun hnaiah hmun \henkhatah an inkap nasa a, an inkahnaa hliam tuar, Aizawla enkawl mek pawh an awm.
Aizawla enkawl mekte hi sorkar sipai an ni lo a, sipai sorkar paih tumtu sipai pawh an ni lo. Mipui zinga mi an ni.
Thu dawn danin, sorkar sipai leh Chin National Army (CNA) te inkahnaa hliam tuar mi pariatte chu Aizawlah enkawl an ni a, hliam na tak tuar an ni lo. An zingah hian nausen thla riat mi pawh a tel.
Mi pariatte hi damdawi in pathum enkawl mek an ni a, sorkar damdawi inah mi pali, mimal damdawi in pakhatah mi pahnih, mimal damdawi in dangah mi pahnih an awm mek tih thu dawn a ni.
Silai lek ni lo, mipui zinga mi, Myanmar ram chhung indo vanga hliam tuar, Aizawl leh Mizoram hmun danga enkawl hi a hma pawhin an lo awm tawh \hin.
Myanmar sorkar sipai, inpe-a Mizorama lut pawh an lo awm tawh \hin a, tun hnaiah pawh an awm leh.
Thla hmasa, November ni 7 khan Myanmar sorkar sipai palite chu Mizoramah luhpui an ni a, anni hi an chin hriat a ni chiah lo. Thudawn pakhatah chuan Myanmar-ah dah kir an ni tawh tih a ni a, finfiah erawh a ni lo.
Mi palite hi CNA kuta inpe an ni a, CNA te hian Champhai district-ah luhpuiin, Zote-a raltlante awmnaah dah an ni. Mahse Assam Rifles mit a kham deuh a, Myanmar lamah thawn kir an ni tawh nia hriat a ni.