MZP-in HSLC-a Mizo titha chawimawi

MZP-in HSLC-a Mizo titha chawimawi
Mizo Zirlai Pawl chuan Mizoram Board of School Education-in High School Leaving Certificate (HSLC) 2026 result a tichhuah taka Mizo zirlai ti tha top-10 a langte chu Thawhlehni khan an chawimawi.
Hmanpuitu School Education minister Dr Vanlalthlana chuan, textbook piahlam thiam a ngai, tiin, byheart system-a kal loa, thiamna tak tak paw chhuak theia zir turin a fuih. Question pattern a danglam zel dawn tih sawiin, “Chumi mil chuan inherrem ve zel a ngai dawn a, in thiamna tak tak lan theihna tur question kan rawn buatsaih chho dawn a ni,” a ti.
Zirlai nih chhungin an hlawhtlinna chan chhan chu nu leh pa, zirtirtute leh khawtlang hruaitute tawngtaisakna vang a ni tih hria a, theihtawp chhuah saktute hriatreng a ngai tih a sawi a. “Kan hriat loh ni la la in kan tlahniam dawn,” a ti.
MZP president Dr C Lalremruata chuan, Mizoram sawrkarin kumin atangin result bu-ah ranking leh division tarlan tawh loh nise, a tih chu, Mizo zirlaite zingah inelna thianghlim a awm theihna atan tarlan ngei nise MZP chuan a duh tih a sawi.
Zirna kawnga hma sawn theihnan question pattern leh exam system bakah kan syllabus siamtha in, midang el pha ve tura hma lak chu zirna kawnga hma kan sawnna atan tih makmawk hmasaah an ngai tih a sawi a. Sawrkar thuneitute chu result bu-a top 10 leh division tarlang leh turin an ngen tih a sawi a ni.
Zirtirtu indaih lo, mahni post-a awm tha duh lo, attach tam lutuk chu MZP chuan a ngaimawh hle tih a sawi a. Zirna chu kan ngaihpawimawh ber tur a nih bakah Mizoram khawtinah sikul kan neih vek avangin, zirna kaihhnawih bik khawihtu tur – Mizoram Education Service neih thuai ngaiin an hria a, zirlaite hmakhaw ngaia tihlawhtling thuai turin thuneitute an ngen tih a sawi bawk.
Tunhnaiah thil pawi leh zahthlak tak, zirtirtu leh naupang inngaizawng emaw zirtirtu in naupang a ngaihzawn chanchin sawi tur a awm a, harsatna neia an hnena rawn tlanlut hial an awm tih MZP president hian a sawi. “Zirtirtu an nihna hmang tangkai a, naupang laka advantage lo la an awm hi MZP chuan a dem takzet a. Kan zirlai bakah nun dan thlenga min zirtirtu tura kan ngaihten an naupangte chunga hetiang rilru an pu hi a mak. Zirtirtute fimkhur turin kan ngen a, sawrkar thuneitute pawh a tul anga hma la turin kan ngen a ni,” a ti.
HSLC Exam 2026-a top 18-a lang Mizo zirlaite
1. Rachel Biakthapari – St. Joseph HSS
2. Marvin Lalrinenga – St. Paul’s HSS
3. Vanmalsawma – Mt. Carmel School
4. H Lalramdinpuii – St. Joseph HSS
5. Federic Vanlalchhuanga – St. Paul’s HSS
6. Vanlalruatfeli – Mt. Carmel School
7. R Lalpekhlui – Living Water School
8. Sarah TH Zonunmawii – St. Joseph HSS
9. Michael Laldinmawia – Divine Intervention School
10. Lalpekhlua – St. Paul’s HSS
11. Vanlalhlupuii – St. Joseph HSS
12. Valentino Lallawmawma – St. Joseph HSS
13. Polly Lalmuansangi – St. Paul’s HSS
14. Zonunsangi – St. Paul’s HSS)
15. LH Laltleipuii – Holy Faith School
16. Lallawmzuala – Mt. Carmel School
17. Rommel Lalchungnunga – St. Joseph HSS
18. Johny Lalruatfela – CLS Academy