Pawla dictatorial power an hman thin ang kha sawrkarah hmang zui – Zoramthanga

Pawla dictatorial power an hman
thin ang kha sawrkarah hmang zui
– Zoramthanga
ZPM sawrkar thuneitute chuan pawl tereuh tete a dictatorial power an hman thin ang kha sawrkar kaihhruainaah a hmang ta zel em ni tih an rorel danah zawhna a awm thei tih MNF hruaitu Zoramthanga chuan a sawi.
Zirtawpnia Mizo Hnam Runa inkhawmah MNF president Zoramthanga chuan, Mizoram sawrkarin village council inthlan hma chhan a sawi chu India Court-in reference-ah rawn hmang se, hei hi judgement order chu a ni alawm, an la rawn tih hun chuan, 2025 VC inthlan pawh hnaih chhan chu ala nuihzatthlak ngawt a ring tih a sawi a. A chhan tha tawk tak awm loa VC/LC inthlan sawn hma emaw sawn hlat chu democracy zahlohna lian tak a ni tih a sawi.
ZPM sawrkarin inthlan hma chhan a sawi hrang hrang chu ‘Chemtatrawta thawnthu’ ang chauh a ni tih sawiin, “An chhuanlam ber sum harsatna chu central atanga deficit grant lokal a zuih zel a, vaibelchhe 30-a a tlem tak thu an sawi kha chhuanlam a tling lo. Vaibelchhe 900 chuang share of taxes atangin kan hmu a, hei hi a remchan ang zela untide fund a ni a, sum harsatna vang a ni, an tih hi chhuanlam a tling lo,” a ti.
Cabinet-ah pawh sawiho miah loa VC inthlan sawn hma chu tu tih nge tiin an la inzawt ngei dawn tih MNF president hian sawiin, “Pawl tereuh tetea dictatorial power hmang thin khan sawrkarah a hmang ta zel em ni? VC/LC inthlan rawn zikchhuah dana chief minister dictatorial power hi awm zel tur atan a tha lo hle,” a ti.
MNF sawrkar tirh, kum 2020 khan VC-ah 63% leh LC-ah 85% an tling a; ZPM sawrkar tirhah erawh VC-ah 48% leh LC-ah 53% chauh an tling a. Lungleiah pawh LC-ah 33% chauh ZPM chu an tling tih a sawi a ni.
MNF sawrkarin OMB leh a dangte atanga sum a puk chu an puk ve dawn lo nia an sawi laiin, thla tin deuhthaw ZPM sawrkar chuan a puk tih chief minister hlui Zoramthanga hian a sawi. SASCI sum vbch. 200 2nd instalment chu project details fel tak siam niin, tender pawh tih fel hman vek a ni a. Contractor thlan vek tawh niin, midang contact security deposit nen lama tifel tawh leh thenkhat chuan an thawk zo tawh a, sum pek chhuah a nih tawh laiin, thawh hmabak la awm insem hial duhna ZPM sawrkarin a nei chu a tha lo hle tih sawiin, “SASCI sum vbch. 200 hi rulh ngai dinhmunah ZPM sawrkar a ding mek a ni,” a ti.
Lengpui Airport chu an hralh a ring lo tih a sawi a. ZPM-in airport hralh a tum chu anmahni vuakletna tur ruahmanna an insiam zawk dawn tih a sawi a ni.