N Khawlek Ruhro Puk ‘State Heritage Site’ a puan remti lo tan hun hawng

Saitual district North Khawlek ramchhunga ‘Ruhro Puk’ chu Mizoram sawrkarin ‘State Heritage Site’ a puan a tum a, remtih lohna nei tan ziaka a chhan leh vang thehluhna hun hawn a ni.
Saitual bawrhsap Srinivas Sadi chuan hriattirna a tichhuak a. Art & Culture department atanga lehkha an dawn angin, Ruhro Puk N. Khawlek chu State Heritage Site-a puan tum a ni a. Puanzar a nih thu ah hian remtih lohna emaw hnialkalhna emaw nei an awm a nih chuan 2026 August 12 tlai dar 5.00 ralhmain bawrhsap hnenah remtih lohna leh hnialkalh chhan chiang taka ziaka thehlut turin a ti. Hun tiam ral hnua hnialkalhna dawn chu pawm a ni dawn lo tih a sawi bawk.
N Khawlek ram, Thingkhuang Ngaw Puk chu 2025 January 11 Khawlek khaw mi Laltlanhlua chuan a hmuchhuak a, N Khawlek khawtlang hruaitute ngen angin Indian National Trust for Art and Cultural Heritage – INTACH Mizoram Chapter chuan Art & Culture department thawhpuiin 2025 May 2 khan enchiangin mihring luruh 9 leh mihring taksa bung hrang hrang ruhro hmuh a ni. Ruhro bakah hian hlumbel keh leh dap tlem an hmuh bak thildang hmuh tur a awm lo.
Heng ruhro hi engtik hunlai ami nge tih zirchiang turin a ‘sample’ thenkhat hi Beta Analytic, Miama Florida USA-ah Carbon-14 dating tih tura thawn niin, zirchian a nih hnuah ruhro hi kum AD 1260 atanga AD 1320 inkar ami an ni tih a sawi a ni. Heng ruhro hi hnam ziarang leh nunphung bakah hnam chanchin zirchianna atana hmanraw tangkai tak tura ngaih a ni.