Nute pualin Sakawrhmuituai Tlangah thing tiak 50 an phun

Women & Child Development leh Environment, Forest & Climate Change department buatsaihin Sakawrhmuituai Tlang Sihphirah Thawhtanni khan nu pual thing pakhat phun ‘Ek Ped Ma Ka Naam and Plant4Mother Campaign’ neih a ni.
Women & Child Development minister Lalrinpuii chuan hmanpuiin a hoin thing phun a ni a. Nute puala thing phun campaign chu tunlai khawvel sik leh sa inthlak danglam zel dolet kawnga hmalakna pawimawh tak a nih thu leh ramngaw chereu zel avanga harsatna a thlen loh nan thingphun kan uar deuh deuh a pawimawh thu sawiin, “Hei hi kan tu leh fate tana kan mawhphurhna leh hmalakna tur a ni,” a ti. He campaign hian thingphun uar kawngah rah tha a chhuah ngei a beisei tih a sawi a; Sakawrhmuituai Tlang chu Swadesh Darshan kaltlanga cheithat tum a ni tih a sawi bawk.
Women & Child Development commissioner & secretary Lalzarmawii sawi danin, sawrkar laipui Ministry of Environment, Forest & Climate Change bultumin, ‘Ek Ped Ma Ke Naam and Plant4Mother’ tih thupui hmangin ram pumah thingphun beihpui neih mek a ni a. Hemi behchhan hian Ministry of W&CD department pawhin hma a la a ni.
Mizorama Anganwadi Centre tinah pawh thingphun tura hma lak chhoh mek a nih thu sawiin, kumin September chhung hian Anganwadi Centre tinah thing tiak pakhat tal phun hman vek tum a ni tih a sawi bawk.
Thing phunnaah hian Mizoram State Commission for Women chairperson C Lalchhandami, Sihphir khawtlang hruaitute leh department thawktute an tel a. Ek Ped Ma Ka Naam and Plant4Mother Campaign pualin thing tiak 50 an phun a ni.