Nagal kal zel zo ta lo

Monte Carlo hmuna clay court tournament lian Monte Carlo Masters khelh mekah India chhuanvawr Sumit Nagal chuan second round a paltlang zo ta lo a, Ningani zan khan ruahin a bumro karah huaisen taka bei chungin world number seven Holger Rune a paltlang zo ngang lo.
Nagal hian set hnihna la chungin Rune leh a team a tihlathawng hman a, mahse, final set-ah tum hnih ngawt a serve a hloh a, darkar hnih leh minute 11 an inchai hnuah 3-6, 6-3, 2-6-in a tlawm.
He second round match hi Nilainia khelh tan niin, ruah avangin an tawp lailawk a, Ningani zanah chhunzawmin, Indian qualifier hian set hnihnaah 1-2-a hnufual chungin set a la a, clay leilung Masters tournament singles main draw match-a Indian chak thei hmasa ber a nih hnuah third round lut hmasaber nihna erawh a sualchhuak zo ta lo a ni.
Unseeded Nagal hian 2019 US Open-ah pawh khan the great Roger Federer lakah pawh set khat a lo la ve ngat tawh bawk.
Kum 26-a upa Nagal hian Roquebrune-Cap-Martin clay cour-a qualifier a hmachhawn laiin eight seeded Flavio Cobolli a hneh a, a dawtah third seeded Facundo Diaz Acosto paltlang leh chungin tournament main draw a chuangkai a; first round-ah thilmak ti chhunzawmin, Italian World No.38 Matteo Arnaldi lakah 5-7, 6-2, 6-4 hnehna a chang a, Indian tennis-ah mellung thar a phun.
Kum 1990 atanga clay leilunga khelh tan Masters 1000 event pathum zinga pakhat Monte Carlo Masters main draw-a hnehna chang thei ngat Nagal hian ATP ranking thar ber tunhnaia tihchhuahah khan a career-a a tawnsan ber hun tawngbuain No. 93 a luah.
Nagal hi Monaco main draw-a Indian tel pha pathumna niin, legendary Vijay Amritraj (1977) leh Ramesh Krishnan (1982)-te hnung a zui ve ta chiah a ni.
Monte Carlo Masters round of 16 men’s doubles match pakhatah mipa double ranking-a world number one ni thei upa ber ni mek India starlian dang Rohan Bopanna leh a Australian partner Matthew Ebden pawh rin loh takin Nilaini khan an tlawm a, Mate Pavic of Croatia leh Marcelo Arevalo of El Salvador lakah 3-6 6-7 (6-8)-in an chak lo.