Nairobi-a gas puakah mi pathum thi

Kenyan capital Nairobi-ah gas nasa tak puak avangin mi pathumin nunna chanin mi 300 chuangin hliam an tuar.
Gas phur lorry chu Embakasi district-ah puakin chu chuan ‘meialh hlawm turu taka siam a ni’ tiin sorkar thupuangtu chuan a sawi a.
Hei vang hian chenna in, sumdawnna leh car te kang chhe nualin eng vanga gas phur lorry chu kang nge a nih hriat a la ni lo.
Embakasi police chief Wesley Kimeto chuan nunna chan zingah naupang a tel thu sawiin nunna chan an la pun theih thu a sawi bawk.
Kenya Red Cross-te chuan mi 271 damdawi in an panpui tawh thu sawiin a hunah mi 27 an enkawl nghal thu an sawi bawk a.
Meialh hlawm lian tak chu a darh zau chak hle tiin Isaac Mwauru Mwauru, sorkar thupuangtu chuan a sawi a, gas cylinder alh leng chuan garment leh textile warehouse chu deng fuhin a kang zui nghal bawk.
“Kangmei chuan a bul vela vehicles leh commercial property thahem tak kang bawkin sumdawnna tenau hmun tam tak a kang chhia a ni” tiin thuchhuah siam chuan a tarlang bawk.
“Vanduaithlak takin a bul hnaia chenna in te pawh kangmei chuan manin in chhungah mi a kan hnan a, zan rei tak a ni tawh bawk si a ni” tiin a sawi.
Tualchhun mite chuan thil puak a awm hnuah a nghawr a na hle tiin an sawi bawk a. Naupang 25 vel lai meikhu hip nasat lutuk avanga harsatna tawk an awm niin Standard newspaper chuan a tarlang bawk a ni.
Hliam tuar zinga pakhat Boniface Sifuna chuan, “Gas canister puakin ka tlanchhiatna lamah min deng fuha ka kan phah a ni. Ka hma lawkah a puaka a nghawrin min tithlu a, insaseng theiin ka awm hlauh zawk a ni” tiin a sawi.
A bul hnai kawtthlera cheng James Ngoge pawhin thil puak ri thuai kan hria a, a tirah chuan eng nge a nih pawh kan hre mai lo “A nghawr a na lutuk a, ka tlu mai dawn emaw ka tia, lirnghing ang mai a ni. A puahna bul hnaiah dawr ka neih pawh a kang vek” tiin a sawi bawk.