Namen lovin tui a NU!

Tlawng lui a nu a, chu chu thil thar pawh a ni tawh lo. A nu telh telh a, ‘a nu’ ti mai lova ‘namen lovin a nu’ tia sawi tur khawp a ni.
Greater Aizawl Water Supply Scheme Phase III hnuaiah Tlawng lui hi Tanhril rama Setlak-ah PHE department-in an la (pump) a, awihawm loh khawpin tun hnaiah a nu!
Tlawng lui tui hi NTU 1000 vel a nihin tihngaihna awm lo khawpa nu a ni a, NTU 1500 vel a nih phei chuan mak tih vawng vawng tham a ni. Mahse NTU 1500 vel te chu a lo zia viau; tun hnaiah NTU 9000 a kai daih anga chhut a ni.
Phase III hnuaia Tlawng tui an lak hi, April ni 27 khan a tehna khawlin a daih loh khawpin a nu a, a nut dan a namai loh em avangin, hriat ve hrim hrim atan tiin PHE department hian an en chhin ta a ni. Tui chu enfiah atan an la a, 10%-in an tifim; tichuan NTU 948 a ni a, 10%-a an tihfima NTU 948 a nih chuan a nut dan chu NTU 9480 vel anga ngaih a ni ta a ni.
Hetia NTU 9480 vel anga an chhut hi, April ni 27 chawhma lam dar 11-a Tlawnga tui luang a ni.
May ni 4 khan zing lamah NTU 1500 vel a ni a, a zia deuh an tih hnuah tlai lamah chuan NTU 1824 a ni leh.
Tui a nut em avang hian tun hnaiah tui an la (pump) mumal lo fo a, an lak theih ni pawhin, ni khatah MLD 18.5 vel la thei tura ngaih an nih laiin MLD 7.731 chauh te an la thei.
Greater Aizawl Water Supply Scheme Phase I leh II hnuaiah Reiek kaiah Tlawng tui hi lak a ni bawk a, helamah pawh tui a nut avangin harsatna an tawk nasa.
April ni 28 khan Reiek kaiah Tlawng tui hi NTU 1508 te a ni a, April ni 29-ah NTU 300-ah a tlak hnuah NTU 1000 te a ni leh. May ni 3 te khan NTU 1500 te a ni a, Ma ni 4 chawhnu lamah khan NTU 650 vel a ni.
Tlawng lui fim lam hi hun pangngaiah NTU 30 te a ni thin a, a pangngaiah chuan NTU 100 a pel ngai lo. NTU 600 te, NTU 700 te a tlin chuan tui hi sem tlaka tihfim a hautak em em mai a, NTU 1000 a tlin phei chuan pump chi-ah an ngai lo.
Kum hmasa lamah Tlawng lui a nut avanga harsatna a thleng fo a, a nu telh telh tih a lan bakah tun hnai teah a nu nasa zual tih thu dawn a ni.
PHE department hian tui hi NTU 5 hnuai lam a nihin a sem tlak an ti a, tui an pump hian NTU 5 tal nihtir tumin bawlhhlo hmangin an tifim thin. NTU 500 hnuai lam te hi chu tihfim a hautak lo a, Tlawng lui tui NTU 30 te, NTU 100 hnuai te a nih phei chuan tihfim hi a awlsam bakah mipui tan pawh a him. Mahse tun hnaiah NTU 1000 a pel ta fo a, NTU 10000 te pawh a hawlh ta thuak thuak a nih hmel.