CADC thawktu thla 5 hlawh pek thuai phut

BJP chuan Chakma Autonomous District Council hnuaia thawktuten thla 5 hlawh an la tawh lo nia sawiin, pe thuai turin Mizoram sawrkar an phut tih an sawi.
CADC-a BJP District Hqrs. chuan Thawhlehni khan Chawngte SDO (Civil) kaltlangin Mizoram larsap hnenah state sawrkarin CADC a ngaihthah nia an hriat thu leh hma laksak tura ngenna ziaka thlenin, Chakma ADC thawktuten hlawh thla 5 chhung hlawh an la tawh lo a. Tum dangah chuan sawrkar kum liamtaa sum pek tlak loh chu, sawrkar kum thar quarter khatnaah state sawrkarin a pek thin laiin, ZPM kaihhruai sawrkar chuan 1st quarter-ah thawktute thla 5 hlawh tlingkhawm cheng nuai 6377.79 chu tun thlenga a la pek loh avangin sum lama harsatna nasa tak a thleng a, ADC inrelbawlna leh mipui rawngbawlna thlengin a nghawng na hle tih an sawi.
Mizoram sawrkarin India danpui hnuaia ADC chanvo a ngaihthahin a enhrang ni hiala an ngaih thu sawiin, tuna CADC-in a dawn tur a la dawn loh sum hi rang taka pechhuak thuai turin sawrkar an phut tih an sawi a ni.
CADC-a BJP president Durjya Dhan Chakma chuan, Mizorama ADC pathum hoah ZPM sawrkar hian sawrkar kum 2024– 2025 leh 2025– 2026 chhungin revised estimates atangin cheng khatmah a la pe lo tih a sawi a. Hei hian ADC sum harsatna a tizual hle, tiin, sawrkar laipuiin state hnenah an mamawh belh tur sum a pek lai a, state sawrkarin ADC hnenah dan anga an dawn ve tur a hup beh sak tih a sawi a ni.