Napoli in champion an hnaih
Pathianni zana Italian Serie A inkhel hmuhnawm takah hmahruaitu Napoli chuan si khat faiin Juventus an hneh a, Naples hian champion hnaih deuh deuh zelin, champion turin vawi khat chak chiah an mamawh tawh.
Allianz Stadium a lenglut Napoli leh mualneitu Juventus te hi an inhnehtawk viau a, minute 90 chhungin goal thun thei an awm lo. Hun pangngaiah goal thun theihna hun tha an neih an chhawr tangkai zo lo ve ve a. Juventus tan Angel di Marid goal thun pawmsak a ni lo. Hun pangngaiah goal thun thei an awm loh hnuin hun pek belhah mikhual team Napoli an vannei a, goal an thun. Minute 90+3 ah Giacomo Raspadori chuan lei hrulah chiang zetin a pet goal a, hmahruaina goal a thun. Hun tawp dawn tepa Raspadori goal thun hi an chakpui a, Napoli in champion an hnaih leh zual sauh.
Serie A table-ah pathumnaa awm mek Juventus an hneh leh tak vangin Napoli hi point 17 zetin an hnuai chiaha awm Lazio lakah an sang fal tawh a, champion an hnaih deuh deuh zel. Napoli hian Inrinni zan khian Salernitana an hmachhawn dawn a, an chak a nih a, Pathianni zanah Inter Milan in Lazio an lo hneh ve bawk a nih chuan kum 1990 hnu lamah a vawi khat nan Napoli hi Serie A-ah an champion tawh ang.
Kar liam ta thawhleh zan khan AC Milan chuan Napoli hi champions League atangin an hnawtchhuak a. UCL semi-final an luh phak loh vangin hnual viau mah se team lian Juventus an hneh vangin an nui a, an tan hlimna ni a herchhuak ve leh ta. Champion teuh viau tawh mah se Napoli manager Luciano Spalletti a tawng fimkhur zui reng a, champion thawka thawkna hun a la nih loh thu sawiin, champion thuai erawh an tum tih Spalletti hian a sawi.
Napoli in champion an hnaih
Get real time updates directly on you device, subscribe now.
Next Post