Narmada voter ID card 343 chhar, Congress-in chhui phut

Madhya Pradesh-a Khargone district, Mandleshwar khaw bula Narmada lui kamah voter identity card 343 chhar a ni a, eptu Congress chuan FIR thehluha chiang taka chhui chhuah an phut.
Hriat theih chinah heng card-ah hian an thenawm, Indore district-a Rau assembly biala mite hming a chuang hlawm.
Mi chengten lui kam an tihfainaah card-te hi hmuin thuneitute an hriattir zui nghal a. Hemi hnu lawk hian social media-ah card darh nuaih leh miten an la khawm lai video chu a darh zui ta vak a ni.
District Congress President Ravi Naik-a leh an party worker-ten Mandleshwar Police Station-ah FIR ziak lut turin an kal nghal.
Naik-a chuan Election Commission of India (ECI) kal dan leh heng thil thleng leh a mawhphurtu chu chiang taka chhui chhuaha hremna pek a phut.
Congress hian lui dung tluan fana voter ID card dang a la awm em tih enfiah an phut bawk.
“FIR ziah luh a nih loh chuan police station-ah kan kal nawn leh dawn a ni,” tiin Naik-a chuan a sawi.
Mandleshwar Sub-Divisional Officer of Police Shweta Shukla-i chuan voter ID card-te hi Narmada lui kam tihfainaah hmuh a ni tih a nemnghet a. Revenue team-in card-te hi kawl zuiin police station in-charge pawh chhui chiang tura hriattir a ni tawh tih a sawi a. Congress hnen atang pawhin complaint an dawng tawh tih a sawi bawk.