National Girl Child Day hawng
District Hub for Empowerment of Women, Women & Child Development department buatsaihin Saitual leh Siaha-ah National Girl Child Day hman tur hawn a ni.
Saitualah hian Zirtawpni khan hawn a ni a. Zingkarah district chhunga hmeichhe naupangte intlansiakin thutiam an la a. Hmanpuitu sub deputy commissioner Christina Lalnunfeli chuan ‘National Girl Child Day’ chu India rama hmeichhe naupangten dikna chanvo an neih theihnana hmalakna a ni, tiin, hmeichhe chunga hleilenna umbo kawnga hma la turin sawrkar laipui chuan Ministry of Women & Child Development a din a, hmeichhiate hmasawnna atan hma lak zel a ni tih a sawi.
Hmeichhe naupang kalkhawmte chu nu in nau a pai laia mipa nge hmeichhia tih enlawk chu dan kalh a nih avangin ti lo turin an intiam a, hmeichhe fa an nih avanga enhran leh thliarhrang lo tur leh hmeichhe naupangten him leh thlamuang taka khawvel an hman theihna atan leh, zirna leh thiamna changtlung an neih zel theihna atan theihtawp chhuah turin an intiam bawk.
Siaha-ah pawh Ningani khan National Girl Child Day 2025 hawn rualin, Beti Bachao Beti Padhao kalpui tan atanga kum 10 tlin lawmna hman a ni a. Hmanpuitu district bawrhsap VL Hruaizela Khiangte chuan naupang chunga hleilen chu a lang leh lang loah pawh a hluar hle nia a hriat thu a sawi a. A tuartu chhungten a titu chu an hmelhriat emaw thenawm emaw an nih vang maia FIR thehluh a ni lo thin chu pawi a tih thu a sawi. A titu chu kan huat viau vang emaw a chhiatna kan duhpui vang emaw ni loin, midangin an tih chhunzawm ngam lohnan leh hmeichhe naupang hmakhua ngaih vang zawkin dan anga hma la theitu hnen pan nachang hriat a tul tih a sawi bawk.
DHEW Siaha district mission coordinator B Zisia chuan National Girl Child Day – January 24-a Siaha khawpui chhung hospital-a nau piangah hmeichhia an awm chuan lawmpuina thuziak leh sumfai an hlan dawn a, Local Girl Champion pakhat thlang chhuak turin an inbuatsaih mek tih a sawi a ni.
National Girl Child Day hawng
Get real time updates directly on you device, subscribe now.
Next Post