Kum kaltaah Aizawl district-a thubuai 48.77% chingfel tawh

Kum kaltaah Aizawl district-a
thubuai 48.77% chingfel tawh
Kum 2024 khan Aizawl district-a police station hrang hrangah thubuai 1460 ziahluh a ni a, hemi atang hian za zela 48.77 chu chingfelin court-ah chargesheet thehluh a ni tawh.
Superintendent of police Aizawl District Rex Zarzoliana Vanchhawng hoin Zirtawpni khan officer-ten kum kalta chhunga pawikhawihna thleng leh thubuai ziahluh bawhzui a nih dan an thlirlet a. Aizawl district-a sub-sivisional officer (SDPO) deputy SP (Prosecution) leh Aizawla police station hrang hranga officer -in- charge an tel. Kum kalta chhunga Aizawl district-a pawikhawihna thlen dan, Aizawl District Executive Force (DEF) hnuaia police station hrang hrang hnuaia thubuai ziahluh bakah dan leh thupek kenkawh chungchanga District Police-te hmalakna thlirlet niin, kum 2025-a dan leh thupek kenkawh leh misual hnuchhui kawnga hmalak dan tur sawiho a ni.
Kum 2024 chhung khan Aizawl DEF hnuaia police station hrang hrangah thubuai (case) 1460 ziahluh a ni a. Aizawl Police Station-ah thubuai ziahluh tam berin, thubuai 489 ziahluh a ni. Heng thubuai ziahluh zawng zawng atang hian case 712 (48.77%) chhui zawh tawh a ni a, chargesheet tawh a ni. Chhui mek case 404 a la awm. Kum 2025-ah January 15 thleng khan thubuai 104 ziahluh tawh niin, chu’ng zinga case 57 chu chhuichhuah (detect) tawh a ni.
Aizawl SP chuan mahni hna leh mawhphurhna tha taka hlen zel turin a chah a. Dan leh thupek kenkawh kawngah dan ang zela kal a pawimawh, tiin, mipui himna ngaipawimawh turin a chah. Hnuchhui (investigation) kawngah tun aia inchher hriam a pawimawh thu leh thilsual tituten dan hnuaiah an phu tawk hremna an hmuh ngei theihnan hnuchhui kawngah tan la thar turin a chah bawk.