National Science Day pual intihsiak

Science Teachers Association Mizoram (STAM) leh Mizoram Science, Technology and Innovation Council (MISTIC) Department of Science & Technology buatsaih, National Science Day 2024 lawmna peng khat atan Thawhtanni khan 2nd State Level Science Competition neih a ni.
Class VIII leh class X zirlaite tan intihsiak hi buatsaih a ni a. Mizoram district tinah neih a ni. Class VIII zirlai 720 leh class X zirlai 1000, an vaiin 1720 an tel.
Aizawlah zirlai intihsiaka tel an thathnem avangin Govt. Chaltlang High School leh Modern English Higher Secondary School ah neih a ni a; district headquarters-ah theuh intihsiak hi neih a ni bawk.
Tun tum intihsiaka tithate hi mahni district theuhah lawmman sem a ni anga, state level ranking siam a ni bawk ang. Zirlaiten science competition hi an hlut avangin STAM chuan lawmawm a tih thu a sawi a. Zirlaiten an hlawkpui ngei a beisei tih a sawi a ni.