Natna benvawn nei damlo 2224 enkawl lai an awm
Cancer bakah natna benvawn hrang hrang avanga damlo, dinhmun hniam leh thih hlauhawma ding mekten rilru hahdam leh zangkhai zawka hun an hman theih nan sawrkarin Palliative Care Unit a din a, tunah hian enkawl mek damlo enkawl 2224 an nei.
October 11 kha World Hospice & Palliative Care Day a ni a. National Health Mission hnuaiah National Programme for Palliative Care (NPPC) hi kum 2016 atangin Mizoramah tan a ni. Dinhmun hlauhawma ding mek damlo leh an chhungten nun nuam leh hahdam zawka hun an hman theih nana inenkawlna leh hemi kawnga inzirtirna ni atana hman thin a ni.
Palliative care tum ber chu, cancer mai ni lo, natna benvawn hrang hrang avanga damlo, dinhmun hniam leh thih hlauhawma ding mekten rilru hahdam leh zangkhai zawka hun an hman theihnan, an na tawrh damdawi hmanga chhawk zangkhai sak a nih theih nan bakah anmahni enkawltu an chhungte thlenga nun nuam leh hahdam zawka an awm theih nana hma lakpui a ni.
Palliative care hi Serchhip leh district thar pathum tih loh Mizoram district dang zawngah kalpui a ni tawh a. Thawktuten Palliative Care Unit-a awmte chauh ni loin, damlote an chenna inah tlawh chhuakin damdawi leh hmanrua nen an buaipui thin.
NPPC Aizawl East District nodal officer Dr Lalfakzuala chuan cancer leh natna benvawn khirh zual, HIV/AIDS, kal tha lo, thin tha lo bakah natna dang veituten hrehawm taka na an tawrh lohna turin Palliative Care Programme hi kalpui a ni tih a sawi.
“Cancer vei zaa 70 hi na hrehawm tuar niin zaa 90 hi nachhawkna nena enkawlna dawng an ni. Chutih laiin zaa 30 hi na tak tuarin mual an liam nia chhut a ni a. Hei vang hian hospice & palliative care pawimawhna a sang hle,” a ti.
NPPC tarlan danin, sawrkar kum 2024- 2025 chhung hian palliative damlo mi 2224 en a ni a, damlo 1155 admit an ni. Palliative damlo thar 366 an awm. Home visit tum 301 nei tawhin, palliative enkawlna dawng chunga in lama thi 88 awmin, damdawi inah mi 61 an thi. Tunah hian palliative care mamawh tan Mizoram State Cancer Institute-ah khum 10, Civil Hospital Lunglei ah khum 8 reserve a ni.
He ni hi Directorate of Hospital & Medical Education director Dr Lalthlengliani’n a hmanpui a ni.