Natna nei tan thisen pek tum lo turin chah

Natna nei tan thisen pek tum lo turin chah
Mizoram State AIDS Control Society (MSACS) chuan Thawhlehni khan Aizawlah thisen pek leh a kaihhnawih zirhona a buatsaih. MSACS hotu Dr Jane Rinsangi Ralte chuan, taksaa harsatna engemaw neiten thisen pek tâlh tum lo turin a ngen.
MSACS project director hian, thisen pek dan kalphung leh HIV/AIDS chungchang a sawifiah a. Thisen pek atanga HIV leh natna tha lo dang inkaichhawn a nih lohnan thisen pe tur an fimkhur a ngai tih sawiin, “Mahni inringhlel chuan thisen pek luih tâlh tum loh a tha. Thisen a thianghlim a, a him ngei a ni tih inhrechiang chauhin an pe tur a ni,” a ti
Natna inkaichhawn theih nei ru reng chunga nihna inzep a, thisen pe lui chu midang hnena natna kai darhtu an ni thei a, chutiang mi chu dan hmanga hrem theih an ni tih a sawi a. Mizoram chu India rama HIV hluar berna state a nih avangin thisen pek uluk lehzuala endik a tul, tiin, tlawmngaia thisen petu zingah pawh thisen dawn atanga HIV leh natna inkaichhawn theih dang vei an awm theih avangin thisen petute thlan uluk a ngai tih a sawi a ni.
Zirhonaah hian MSACS joint director Dr Lalnunhlima Khiangte chuan “Transfusion – Transmissible Infection and Screening” tih thupui hmangin a sawi a. Zoram Medical College & Hospital Blood Bank medical officer Dr ST Lalhriatpuii’n thisen pe thei chin leh pe thei lo chungchang, thisen then dan hrang hrang sawifiahin zawhna awmte chhan a ni.