Naupang enkawltute zirtir

Naupang enkawltute zirtir
National Commission for Protection of Child Rights (NCPCR) leh Mizoram State Commission for Protection of Child Rights (MSCPCR) tangdun chuan zirna in leh naupang enkawlna hmuna awm naupangten rilru hrisel leh an hriat mamawh hrilhhriat kawnga a enkawltute intuaitharna chu Nilaini khan an buatsaih.
Workshop hmanpuitu MLA Baryl Vanneihsangi chuan Child Care Institutions (CCIs) a thawkte leh naupang enkawltuten mawhphurhna sang tak an nei a, naupangte hmalam hun atana an thawhna chu a thlawn dawn lo tih a sawi. Rilru lama harsatna neite chunga kan ngaihdan dik lo neih thin tih bo a tul tih sawiin, kan chhungril hriselna ngaihpawimawh a ngai hle tih a sawi a. Puitling zawk pawhin harsatna hmachhawn harsa kan tih laiin, naupang phei chuan sawichhuah dan an thiam loh thin avangin an harsatna hmuhpui leh hriatthiam pui an ngai hle tih a sawi a ni.
Mizoramah naupang humsual dai leh nu leh pa enkawltu mumal neilo enkawlna hmun CCI-a naupang awmte chu a bikin ngaihtuah an ngai a, anmahni enkawl turin chhungrila harsatna an tawhte hriatthiam pui a ngai tih a sawi bawk.
MSCPCR chairperson Jimmy Laltlanmawia chuan workshop-in a tum leh MSCPCR hmalakna a sawi a. Women & Child Development joint secretary Zonunthari chuan an department hmalakna leh hnathawh a sawi bawk.
Workshop-ah hian State Mental Health Programme nodal officer Dr Robert L Khawlhring, Zoram Medical College-a clinical psychologist Lalawmpuia te bakah NCPCR-a psychologist Charvi Sethi ten an zirtir a ni.
Zirhonaah hian School Education department, Women & Child Development hnuaia CCI enkawltute, Health department official-te leh hemi kaihhnawih NGO-te an tel a ni.