Naupang laka hursualna thubuai 126 ah pawikhawitu kum tling lo
Kolasib district-ah kum 2016- 2024 inkara POCSO hnuaia thubuai ziahluh 126 zingah pawikhawitu tam zawk chu kum 18 hnuai lam bawk an ni.
Hursualna laka naupang venhim kawnga thawktu, office leh tlawmngai pawl hrang hrang hruaitute chu ‘Protection of Child from Sexual Offences Act 2012’ chungchangah Thawhtanni khan Kolasibah thutkhawm a ni. Kaihruaitu, district bawrhsap John LT Sanga chuan khawtlang nuam siam tur chuan naupangte zalen leh himna hmun ngaihtuah tel a pawimawh a, chumi tur chuan naupang venhimna dan kan neihte hriatchian a ngai tih a sawi. Hursualna avanga naupang nun kawng thui tak a chhe zawnga nghawng thei thil duhawm loh thleng tur ven nan leh hetiang tih hmangte man chhuah leh hrem an nih theih nan POCSO Act inzirtir a pawimawh tih a sawi a ni.
Thutkhawma sawi danin, kum 2016 atanga 2024 thleng hian POCSO hnuaiah thubuai ziahluh 126 a awm tawh a, chu’ng zinga pawikhawitu tam zawk chu kum 18 hnuailam bawk an ni. Naupangin ngaihven an hlawh lohna chungkua, eizawnna avanga inchhungkhura puitlingin fate an uap tam lohna chhungkua, ruihtheihthil avanga chhungkaw buai leh nu leh pate vilpui loh a naupangin phone an khawi tamna chhungkua ah POCSO thubuai hi a tam deuh niin a lang.
Kum tling lo zingah bawk POCSO buaina hi a tam avangin zirna in leh kohhran kaltlanga inzirtirna kalpui a pawimawh, tiin, hemi kawngah hian mithiamten naupang kum bithliah dan azirin zirtirna pek nise tih rel a ni. Pawikhawihna lian zawk a thlen loh nan kum tling lote chunga zahmawh rawngkaia zaizir leh tawngkaa inchhaih nawmnah awm chuan naupangin an chhungte emaw thuneitute hrilhhre thuai tura zirtirna pek thin a pawimawh tih sawi a ni. Court thleng loa inngaihdamna chu sual tihzalenna hmanrua a ni tih sawi a ni bawk.
Kolasib CJM Cacy Malsawmtluangi Ralte sawi danin, POCSO Act 2012 hian kum 18 hnuailam mipa leh hmeichhia a huam a; POCSO hnuaia a tuartu hmel leh nihna pholan chu dan hmanga hrem theih a ni tih CJM hian sawiin, naupang chungah thil tha lo a thleng a ni tih hre si a, thuneitute hnena thlen lotu pawh hrem theih an ni tih a sawi.