NDMA-in chhiatna thleng enfiah Nunna chan 6, in chhia 200 chuang

National Disaster Management Authority (NDMA) hotute chuan Mizoram-a khuarel chhiatna thleng leh chhiatna hmachhawn dan belchiang a, a tul anga hmalak dan rel turin an lokal a, State Disaster Management Authority leh Disaster Management & Rehabilitation department hotuten an lo dawngsawng.
NDMA official-te hian Aizawl leh Lengpui inkar (Pukpui) kawnga lung tlak thinna hmun an tlawh nghal a; Pukpuiah hian kumin April 28 khan lung tla-in Lalrinliana, Falkland-te chhungkaw chuanna lirthei delhin, amah bakah a nupui leh an fanu in nunna an chan phah a ni.
Ruahman dan chuan NDMA hotute hi vawiin – August 12 hian district thuneitute leh mi pawimawh dangte nen an thukhawm dawn a. State Emergency Operations Centre Aizawl an tlawh nghal ang. August 13-ah Champhai district leh Khawzawl district-a khuarel chhiatna thlen nasat zualna hmun an tlawh anga, District Emergency Operations Centre an tlawh nghal bawk ang.
State Emergency Operations Centre chhinchhiah danin, kumina fur intan hnu – May 24 atanga August 11 thleng khan Mizoramah hemi kaihhnawiha nunna chan 6 an awm a, leimin/ lei tawlh 922, in chhia /chim 283, in rauhsan 347, tui lian vanga in rauhsan 114, kawng ping 446, retaining wall chim 76, kawng chhak lung tla 18, thing tlu 10, electric ban tlu 12, lei tlahniam 12, thlanmual chim /min 3 a awm a. Sabereka Khuangkaih tum 7 a awm bawk.
A district ang zawng chuan Champhai, Serchhip leh Aizawl chu a nuai nat ber ber an ni a. Nunna chan phah pawh hi heng district pathum ami an ni. Hetihlai hian Mamit, Saitual leh Lawngtlai district chu tun fur chhunga chhiatna liantham thlen tam lohna an ni thung.