Neih inangah hmun dang aia tlawh chakawma siam a ngai – Tourism minister

Neih inangah hmun dang aia
tlawh chakawma siam a ngai
– Tourism minister
Khualzin hip lut turin state dang nena kan neih inang rengah pawh tlawh chakawm zawka kan cheia kan phochhuah a ngai tih Tourism minister Lalnghinglova Hmar chuan a sawi.
Tourism department a chan hnua a tumkhatna atan minister hian Tourism directorate a tlawh a, department hotute nen an inkawm. Mizoram-in tourism-ah ‘potential’ a nei tha kan tih thin rualin, thenawm state-te neih loh ang neih bik kan nei tam chuang loa; tlang, ruam leh lui inang kan nei, tiin, “Hei vang tak hian thenawm state aia tlawh chakawm turin Mizoram kan chei a, kan phochhuah a ngai. Chumi tur chuan kawng tinrenga kan tan a ngai a, infrastructure siam belh ringawt a tawk dawn lo,” a ti.
Department tana a hmathlir thenkhat sawiin, department official-te nen thawhhona tha tak neih a beisei a, phurawm pawh a tih thu a sawi. “Tourism hmasawnna chu building sak leh cheithat mai piahlamah tourist an pun leh pun loh atangin a langchiang dawn. Kum hmasa aiin Mizoram tlawhtu tourist ngah kan tum tur a ni,” a ti.
Mizoramah tourist-te rei zawk an cham theihnan ‘tourism package’ mumal tak neih a ngai tih Lalnghinglova Hmar hian a sawi a. Aizawl khawpui chu India ram state khawpui dang ang lo takin hmun khat atanga lang zau thei, view mawi em em nei a ni a, hei hi pho chhuah thiam a ngai tih a sawi. Mizorama hmun mawi bik kan chei rualin, khawpui chu khualzin tlawh hmasak a nih thin avangin chei a tul a, mipui pawh khualzin dawngsawng tura an inpeih a ngai tih a sawi a ni.
“Khualzinte tan thlenna hmun him leh rintlak zawk chhawp turin homestay kan neih mekte enfel (regulate) a, inkaihhruaina mumal zawka kalpui a tul. Mizoten Krismas kan lawm dan chu khawvel danga awm ve lo a nih avangin state leh ram pawn lammi pawhin chhim ve an chak tur a ni a, phochhuah theih a nih a rinawm,” Tourism minister hian a ti.