Prof. Vanlalchhawna
-- Advertisement --
October 30, 2024 khan Mizoram State University ‘draft bill’ chungchang Minister hovin sawiho a ni a. House a put lut a nih theih nan Cabinet ngaihtuah tura dah a ni. Sawrkar thuchhuah tarlan danin State university thar hlak din a hautak dawn avangin state college thlan bik pali (4) chu sawikhawmin cluster university neia Mizoram State University hi din tura ruahman a ni. Cluster University pahnih Srinagar leh Jammu entawna duan a nih thu tarlan a ni bawk.
Cluster University pahnih Srinagar leh Jammu te hi ‘The Srinagar and Jammu Cluster University Act 2016’ hnuaia din a ni. RUSA scheme hnuaia din niin, constituent college panga (5) ve ve an nei. RUSA scheme hnuaiah khan state college te tihchangkan nan Cluster university hi ruahman a ni a; hemi atan hian sum tam tak dah a ni nghe nghe. State thenkhat pawhin cluster university hi an din nual a. Cluster university din chhan tam ber hi chu college changtlung zawk neih theih nan tih a ni.
RUSA scheme hnuaia cluster university leh NEP 2020 hnuaia cluster university/college te hi an kalhmang a inang lo tih hriat a tha awm e. RUSA thar PM-USHA (June 2023) leh Accreditation system thar (NAAC 2024) nen pawh a inrem chiah tawh lo bawk. Hetiang a nih avangin university leh college kalphung thar NEP 2020 leh UGC Guideline (2022) te ruahman dan tlangpui hriat chian hi a pawimawh a, tawi deuhvin tarlan kan tum a ni.
NEP 2020 RUAHMANNA
NEP 2020 hian India ram zirna sang- university leh college te siamthatnan rawtna tam tak a siam a. NEP 2020 para 10-naah hian zirna sang kalphung sawikhawm leh sawhngheh dan tur tarlan a ni. Policy thar hian India rama university leh college zirna darhsarh leh chiri lutuk hi a ngai mawh hle a; hengte hi hlawm khawm a, sawhngheh a, zirna hmun lian tak, subject chi hrang tam tak zirna hmun ‘multidisciplinary university/college’-ah emaw, ‘Higher Education Institution (HEI) Cluster/Knowledge Hub’-ah emaw siam a tum a ni.
University hi chi hrang pathum – Research-Intensive University (RU), Teaching-Intensive University (TU) leh Autonomous Degree Granting College (AC) te awm tura ruahman a ni. Research-intensive university chu zirtirna leh research tihna hmunpui a ni kawp ang. Teaching-intensive university hnuaiah zirtirna lam an uar ang, research lam pawh an kalpui tho ang. Autonomous degree granting college te chu zirna chi hrang, peng tam tak zirna niin, undergraduate zirna hmunpui an ni ang.
College te chu sawikhawmin emaw, subject dah belhin emaw, multidisciplinary institution-ah siam tur a ni; graded accreditation system hmangin mahnia degree pe tlak ‘Autonomous degree granting college’-ah hlankai tur a ni. Multidisciplinary college-a siam tawh, mahnia degree pe phak lote chu university hnuaiah ‘constituent college’ a dah tur an ni. RUSA scheme hnuaia degree college te sawikhawm a, cluster university hnuaia ‘direct’ a dah ang kha a ni lo.
Kum 2040-ah chuan India ram chhunga zirna sang te hi ‘multidisciplinary institution’ niin, zirlai tam tak awmna hmun an ni ang. College te chuan kum 2030-ah multidisciplinary institution ni turin tan an la ang; district tinah pakhat tal a awm hman beisei a ni.
Affiliated college leh thlur khat chauh zirna (single stream HEI) te chu multidisciplinary institution a siam (transform) a, zawi zawia tihtawp (phased out) tur a ni. Affiliated college te hi kum sawmpanga (2020-2035) chhungin multidisciplinary institution-ah thlak a, ‘graded accreditation system’ hmangin ‘autonomous degree granting college-ah hlankai tur an ni. State sawrkar leh affiliating university te chuan affiliated college te chu vil zuiin, ‘autonomous college’ ni thei turin theihtawp an chhuahpui ang.
UGC RUAHMANNA
Kum 2022 khan UGC chuan NEP 2020 duh dan anga University leh college te multidisciplinary institution-a siam dan tur kawng thumin a ruahman a. Chungte chu (i) University/college te thawhhona (academic collaboration), (ii) inzawmkhawmtir (Merger of HEIs) leh (iii) department hawn belh (adding department) te an ni. Pakhatna college te thawhhona chungchang bik hi sawi zui ta ila. Kawng thumin ruahman a ni.
(i) Dual-major degree atana thawhhona: Subject thlur/peng khat chauh nei te chuan college lian zawk thawhpuiin, subject tam zawk zirna an nei ve thei ang. Multidisciplinary institution nisa ten subject/programme hawn belhin huang an zauh theih bawk. Entirnan, B.Ed leh B.A inkawp zirna siamin, B.A., B.Ed (Integrated Teacher Education Programme-ITEP) hawn theih a ni. Hawn phalna leh degree hi affilliating university-in a pe ang; professional course hi professional council- pek tur a ni thung. Institution te hian thawhhona thuthlung an ziak ang.
(ii) Dual degree atana Institution pahnih thawh dunna: Dual degree (entirnan B.Tech & M.Tech) pe tura thawhhona hi institution pahnih inkarah siam theih a ni. Degree hmasa zawk hi ‘host institution’ in a pe ang; degree dang hi ‘partner institution’-in a pe thung ang. Thawhdunna thuthlung ziakin, phalna (State, University. Regulatory bodiy) atangin lak tur a ni. Entirnan, IIT Jammu leh IIM Jammu te chuan thawh dunna thuthlung siamin, IIT Jammu-in B.Tech degree, IIM Jammu-in MBA degree a pe dawn a ni.
(iii) Cluster of college: College hrang hrang te hlawm khata dahkhawm tur a ni. Zirna peng khat chauh nei leh college lian zawk thawhho theihna tur a ni bawk. Zirlaiten cluster college hnuaiah parent college leh partner college atangin an zir kawp thei ang. Academic Council leh Finance Committee an nei ang; university hnuaiah ‘affilliation’ an nei ang; admission te, examination te, result leh degree te chu university-in a pe ang. State sawrkar college an ni zui zel ang. Thawhhona thuthlung ziak tur a ni bawk.
Cluster college enkawltu ‘Board of Directors’ siam tur a ni. Zirna peng hrang hrang te chu an awmna university ‘statutory body’ hnuaiah an awm ang. Board of Directors, Academic Council, Finance Committee leh Curriculum Development Committee te nei hrang mah se, affilliated college angin an awm rih ang. Hun engemaw chen hnuah ‘cluster of college’ te chu college pakhat (single unit) angin ‘affilliation’ pek tur a ni.
Multidisciplinary institution anga an insiamrem hnua-ah ‘graded accreditation system’ hmangin ‘autonomous degree granting college’-ah hlankai tur a ni. Grading an neih dan azirin Research intensive university emaw, Teaching-intensive university emaw an ni zui thei ang.
ACCREDITATION SYSTEM THAR
NEP 2020 duh danin university leh college te tehfung thar ‘graded accreditation system’ chu NAAC chuan January 27, 2024 khan a tichhuak a. Accreditation chi hnih Binary Accreditation leh Maturity-Based Graded Accreditation te siam a ni. Binary Accreditation hnuaiah hian college leh university te chu ‘accredited tih emaw, not accreditated’ tih emaw chauh pek tur a ni.
Maturity-Based Graded Accreditation hnuaiah hian tehkhawng Level 1- 5 thleng a awm a; level 1-4 hi tualchhung university tehkhawng tur a ni; level 5 hi ‘international level’ tehkhawng tur a ni thung. Binary Accreditation hi June 2024 atanga hman tan a ni a; Graded Accreditation hi December 2024 atanga hman tan tur a ni bawk. Accreditation system thar hnuaiah ‘accreditation’ nei turin Mizoram college te chu NEP 2020 duh dan anga an insiamrem a ngai dawn a ni.
STATE SAWRKAR TIHTUR
State university thar tur ruahman leh NEP 2020 duh dan anga State sawrkar college te sawikhawm a, ‘multidisciplinary institution’-a siam leh ‘autonomous degree granting college’ a hlankai hi state sawrkar kut a ni. UGC ruahmanna anga hmalak a him ber ang.
UGC ruahmanna angin ‘affilliated college’ thenkhat hi dual-major degree (B.A., B. Ed etc) zirna turin sawikhawm theih a ni. Tin, college thenkhat, department hawn belh a, tihlen mai theih an awm bawk. College tam zawk erawh hi chu cluster pali emaw, panga emaw a sawikhawm a, multidisciplinary institution atan ruahman tur a ni.
Multidisciplinary college, autonomy nei phak loten university hnuaiah ‘constituent college’ nihna an dil thei ang; university nen inremna fel tak ziak tur a ni. College pali chauh thlang chhuak a, constituent college a dah a, state university din tum hi NEP 2020 leh UGC kaihhruaina nen a inmil lo deuh niin a lang.
College sawikhawmna dan (act/regulation) hi siam ngei tur a ni. Cluster college kalhmang tur te, Board of Directors, Academic Council, Finance Committee leh Curriculum Development Committee din dan te ruahman tur a ni.
State university din turin, NEP 2020 duh dan angin ‘State University Act’ siam tur a ni. Hei hi State Assembly-ah pass tur a ni a. University tha tak din hi Mizo hnam tan a pawimawh em avangin ngun taka ngaihtuah a, ruahman tur a ni.
TLANGKAWMNA
NEP 2020 hnuaia din ‘autonomous degree granting college’ te chu university a ngaih an nih tak avangin ‘cluster university’ hranpa din kher a tul lo niin a lang. Constituent college ni turin multidisciplinary institution nih hmasak phawt a tul bawk. Mizoram mamawh chu State University pangngai, post-graduate zirna, research tihna hmunpui leh constituent college te enkawl thei a ni. Mizoram collge te chuan constituent college nih tum mai lovin ‘autonomous degree granting college’ ni ngei tura tan lak a tul hle dawn a ni.
References: (1) NEP 2020, Ministry of Education (July, 2020), (2) Guidelines for Transforming Higher Education Institution into Multidisciplinary Institution, UGC (September, 2022); (3) PM-USHA Guidelines, Ministry of Education (June 2023); (4) Major Reforms in Accreditation of Higher Education. NAAC (Press Release Dated 27 January, 2024)