Inrinni zan Melbourne Park-a 2023 Australian Open women’s singles title inchuhah 4-6, 6-3, 6-4-a Kazakh 22nd seed Elena Rybakina hnehin Belarusian nula Aryna Sabalenka a champion a, Daphne Akhurst Memorial Cup-ah a hming a chuang ve dawn ta a, mahse, Ukraine runtu Russia a puih avangin tennis thuneitu sangte’n ram pahnih hi hremin, tournament-ah reng reng Russia leh Belarus hminga an player-te chhuah a khap a, Sabalenka pawh hi neutral player ni chungin Australian Open-ah a inlan a, chutiang player ni chunga grand slam title la thei hmasaber niin, a trophy lakah erawh a hming bulah Belarus ziah a rem dawn lo thung!
-- Advertisement --
Hmeichhe tennis game-a hlap na dun pahnih final khela dingchang ta zawk Belarusian Sabalenka kha kumin bika vawi 11 a chakzawnna niin, vawiina hmei-chhe tennis ranking thar tarchhuahah a career-a a tawnsan ber hun tawngbuain Iga Swiatek hnungah number two a luah.
Bul tan fuh lo Adelaide champion Sabalenka chuan set hmasaber hlohin, tun kha a match khelh hnuhnung 11-a set a hloh vawikhatna niin, a hnuah erawh kum 24 mi a insiamtha a, history thar siamin neutral athlete zinga major title la thei hmasaber a ni zui ta hial a ni.
World number one hlui Billie Jean King kut atanga trophy a dawn fel hnua mipui hmaa thu a sawiah Sabalenka chuan entu mipui avanga boruak pui tak avangin lawmthu a sawi zet a, tour-a amah puitu a team chungah a lawm tih tarlangin, nikum lamah hnualna tur tawng nual mah se an thawkrim tih a sawi a, “Kum tharah pawh he hmunah hian ka inlan leh theih ngei ka beisei a, tennis tha zawk lantir a tum thu leh supporter tam zawk a neih a beisei thu a tarlang tel.
Tarlan tak angin, Rod Laver Arena final lianah khan Wimbledon champion Elena Rybakina pawh ‘neutral’ player ni chunga inlan thei tur a nih laiin Russia rama piang hian a ram a thlak a, kum 2018 khan Kazakhstan mi ni tura a inziahluh tak avangin ani kha chuan an ram flag hnuaiah final a khel thei bik a, chuti chungin Inrinni final match-ah khan inkhel entu mipuiin Australian Open-a a vawikhatna atan champion zawk ram hnam puanzar an vai phe thei ta lo.
Tournament tan niah Ukraine ram hruaitu pawimawh pakhatin an ram player tawiawma inkhel a en laiin a hnungah Russia flag a lo intar a, social media lamah darh nghalin, Australia rama Ukraine embassy chuan tournament organiser-te hnenah ‘complaint’ thehlutin, a ni hnihna atang chuan Melbourne Park-ah fans lamin Russian leh Belarusian flag an kenglut thei ta lo a ni.
Hnehna a chan hnua an kawmnaah Sabalenka hi zawhna zawttu chuan neutral player a nihna chuan a hlawh-tlinnaah nghawng a nei det em tih a zawt zauh a, neutral player zinga major title la hmasaber chuan tawi bul hmaka chhangin, “Mi zawng zawngin Bela-rusian player ka ni tih an hriat ka ring. Chu zawng chu,” a ti hul hak!
Nikum Wimbledon-ah phei kha chuan Sabalenka bakah Russian leh Belarusian player dangte chu tel ve phalsak an ni lo hmiah a, kha vang khan men’s ATP leh women’s WTA tour chuan London grand slam tournament kha nikum atan ranking point keng tel thei lo turin an hreklet ve ta nghe nghe.
Ukraine laka Russia chetna a la kal reng a, kuminah Wimbledon organiser-te hian ram pahnih player-te an hnawl leh dawn em tih hriat theih a ni rih lo.
Wimbledon khelh phalsak a nih tak loh avang khan tuna Australian Open hnehna a sualchhuah hi a duhawm zual em tih zawhna chhangin Sabalenka chuan, “Ka tan Wimbledon khelh theih loh kha a namai lo hle a, hun harsa tak a ni. Chutih laiin a hnuah US Open ka khel thei ta tho a, tunah chuan Wimble-don lam biahthu pawh a ni chiah tawh lo e, ka thawhrim rah ka seng ve a ni mai e,” tiin a chhang fel leh et.
Sabalenka hian a hawhtlinna chu an ram Belarus mipuite pawhin an chhuang ve hle tura a ngaih thu sawi chungin a chipuite nena champion lawm nghal rum rum tumna a neih rih loh thu a sawi a, tun dinhmuna a khawsakna Miamia khaw lama let rih phawt a tum thu a tarlang tel.
Hetih lai hian Belarus tennis federation lam chuan an ram tennis player zinga grand slam title la thei pahnihna lawmpui turin thuchhuah rang tak an siam.
Belarusian zinga major title hawn ve tawh dang chu Australian Open-a vawihnih champion tawh Victoria Azarenka niin, kumin hian semi-final paltlang zo loin a tla.