New Market building tlawh

Aizawl New Market building thar sak mek chu Thawhlehni zing khan Commerce & Industries minister F Rodingliana chuan tlawhin hnathawh a enfiah.
Minister chuan bazar building sak mek hi mipui nghawng tak tak thil a nih avangin a ngaipawimawh a, chak zawka hna thawh a tul tih a sawi. Hnathawh mekte uluk taka vil tur leh quality control uluk turin a enkawltu department a chah a, contractor-te pawh chak zawka hna thawk tur leh harsatna an neihte hma lak ho zel tul a tih thu a sawi.
Building sak mek chu a hmangtu tur mipui tan veivah a awlsam zawknan leh rikrum thila chet a awlsam zawknan a tira ruahman dan chu building a len em avangin building tin inkalpawh theih turin department hotute leh engineer-te ruahmanna thar siam belh turin minister hian a ti a. He ruahmanna ang hi chuan inkalpawhna siamna tur zawn zel stall awm tura ruahman chu paih a tul avangin, stall awm tur zat pawh a hma aiin a tlem hret dawn a, hei hi mipui him zawkna atana tih a nih avangin tih ngei ngei erawh a ngai tih sawi a ni.
Bazar seat leh stall changtuten midang hnenah an hralh chhawng thin nia sawi awm chu a ngaimawh tih sawiin, Commerce & Industries department thuneitute chu enfiah turin a chah.
j New Market-ah hian building pahnih – Smart City Mission hnuaia ‘City Centre’ leh Commerce & Industries department hnuaia sak ‘City Centre Annexe’ sak mek a ni.
k City Centre project hi cheng nuai 4035 man niin, dawr 1105 a awm thei dawn a. Four wheeler 31 leh two wheeler 79 dah theiha ruahman a ni. Cold storage, CCTV, service life leh office ruahman a ni. Ground floor leh basement bakah floor 7 awm tura ruahman a ni.
l City Centre Annexe sak mek hi cheng nuai 3641.59 man a ni a, dawr 135 a awm anga, hawkers 183 thu thei tura ruahman a ni. Two wheeler 219 leh four wheeler 69 dahna bakah staff quarters engemawzat sak tur a ni.