Newcastle in Qarabag an sawp

Nilai zan khan UEFA Champions League last 16 play-off khelh chhunzawm a ni a, Newcastle United chuan mikhual an nihna hmunah mualneitu FK Qarabag chu chu 6-1 ngawtin an sawp. Mikhual an nihna hmunah 6-1 ngawt an chak vangin Newcastle hian last 16 an lut ngei dawn niin a lang.
Newcastle hi an lenluhna mual Tofiq Bahramov Republican Stadium-ah an huangtau hle a, goal pawh an thun hma hle. Inkhel tan atanga minute 3-na lekah Anthony Gordon chuan hmahruaina goal a thun nghal. Hma takah goal an thun vangin Magpies hi an phur viau a. Azerbaijan club lian an ngam zui hle. Hmahruaina goal an thun atanga minute nga hnu lekah Malick Thiaw chuan an goal hnihna a thun zui leh zat a, minute 10 em pawh an khelh tlin hmain Newcastle in goal hnih an thun hman der.
An mikhual laka an si phurh sut tum viau mah se Qarabag an che fuh thei lova, awmze neiin an khingpuite an nawr tlang thei tak tak lo. Goal a luh belh lawk loh hnuin Newcastle United an che fuh nawn leh a, chawlhlawk hmain goal thum an thun belh leh hman. Goal thun mamawh tak Qarabag hian penalty an chawi. He penalty hi hmahruaina goal thuntu Gordon chuan pet goal in an goal thumna a thun. Penalty a pet goal hnu lawkah Anthony Gordon hian minute 33-naah an goal lina a thun zui leh zat a, chawlhlawk hmain hattrick a siam hman der.
Qarabag lama goal thum thun a, lungthu kim tawh Gordon hian chawlhlawk dawn hnaih minute 45+1-ah an goal ngana a thun zui leh zat a, chawlhlawk hmain goal li ngawt a thun hman. Gordon goal thun hnu hian chawlhlawk hmain goal dang a luh belh thei tawh lova, Magpies in 5-0 a hmahruai chungin chawlhlawk an hmang.
Chawlhlawk hnu lamah mualneitu Qarabag an khel tha ve hret a, an thangtlawm lutuk chhan nan goal khat an thun ve hram. Azerbaijan club lian tan hian Elvin Cafarquliyev chuan minute 54-naah goal thunin an si phurh a sut then. Goal an thun vangin phur thar deuh surh mah se an phur rei lo. 5-1 ngawta hmahruai tawh Newcastle tan hian Jacob Murphy chuan minute 72-naah an goal rukna thunin a tawp a khar a, mikhual an nihna hmunah 6-1 ngawtin hnehna an chang zui ta a ni.
Mimualah 6-1 ngawta an chak vangin Newcastle United hi last 16 lut turin an dinhmun a tha tawh hle. Qarabag hi St James Park-ah an mikhual zui ve leh dawn a. An muala second leg hmachhawn tur an nih vangin an dinhmun a tha leh zual. An mualah an tlawm chian em vangin FK Qarabag tan Newcastle lehthal a, last 16 lut turin thil mak a thlen a ngai tawh ang. Magpies in thilmak thleng tur dan an tum ve thung ang.