Neymar a tel ve lo

Brazil chuan March ni 26 leh ni 31 hian World Cup hmaa inkhel an hmachhawn hnuhng ber tur an hmachhawn dawn a. Manager Carlos Ancelotti chuan World Cup khelh ngei tuma tan khawh nasa tak Neymar a ko tel ve lo.
Player langsar, ball thiam leh tnawhriat ngah Neymar hi Brazil club Santos tan a khel mek a, season liam ta khan League-ah vawi 31 khelin goal 13 a thun. Santos hi tlakhniam hlauhawmah an awm reng a. World Cup khelh phak a tum em vangin Neymar hian chhanhim tumin tan a khawh nasa hle. Hliam tenau nei chungin pawhin theihtawp tak meuh meuh a chhuah a, Santos hian tlakhniam an pumpelh ta reng bawk. Santos tan a chetthat chhoh leh tak vangin Neymar hian Brazil aiawh phak leh a inbeisei hle a. Amah ngaisantute pawhin tam tan a khelh leh ngei an ring viau bawk. Beiseina sang tak nei bawk mah se World Cup hmaa friendly match an hmachhawn hnuhnung ber turah erawh koh tel a ni ta chung rih lo thung.
Brazil hian football ram ropui zinga mi France chu March ni 26 hian Boston-ah an hmachhawn dawn a. March ni 31 zanah World Cup 2022 quarter-final-a an hneh loh Croatia an hmachhawn zui leh bawk ang. France leh Croatia hmachhawn tura koh tel a nih loh vangin Brazil tan vawi 128 khel a, goal 79 lai thun tling tawh Neymar tan World Cup khelh phak a har viau dawn niin a ngaih theih. Hetihlai hian manager Ancelotti chuan Neymar hi a fit tawk loh vanga ko rih lo mai a nih thu a sawi a. Tunah ko rih lo mah se World Cup erawh chu thil dang daih a ni a. October 2023 hnu lamah ram tan la khel leh ta lo Neymar tan tuna a koh loh vang hian World Cup khelh a tumna kawng kharsak a ni tihna a nih loh thu a sawi ve thung.
Neymar koh tel a nih loh laiin manager Carlos Ancelotti chuan a vawi khat nan Igor Thiago leh Rayan te a ko ve thung a. Real Madrid forward Endrick pawh kohkir a ni bawk.
Brentford striker Igor Thiago hi season kal mekah a chetha viau a, EPL-ah goal 19 zet thun tling tawhin goal thun hnem ber dawttu a ni mek a, a chungah hian goal 22 thun tawh Erling Haaland chiah a awm. Club tan a chetthat em vangin football ram ropui Brazil tan khel turin koh a ni ve ta nawlh a. France leh Croatia laka a chet dan a zirin World Cup khel tlak a nih leh nih loh bukin a awm zui ang.
Thiago rual hian AFC Bournemouth winger Rayan pawh a vawi khat nan koh a ni ve bawk. Ryan hian thlasik bazar lai khan Bournmouth hi Vasco de Gama atangin a zawm a. EPL-ah goal hnih a thun tawh. Brournemouth tan hmuhnawm taka a inlan thin vangin ram tan khel turin koh a ni. Thiago leh Ryan rual hian Gabriel Sara pawh a vawi khat nan koh a ni ve bawk. Sara hian 2024 khan Norwich City chhuahsanin Galatasaray a zawm a, Turkish Super League-ah a champion pui nghal. Galatasaray hi Champions League lamah pawh an chetha rih viau a, last 16 first leg-ah Liverpool an hneh nghe nghe a nih kha.

Brazil squad
Goalkeepers: Alisson (Liverpool), Bento (Al-Nassr), Ederson (Fenerbahce)
Defenders: Alex Sandro (Flamengo), Bremer (Juventus), Danilo (Flamengo), Douglas Santos (Zenit Saint-Petersburg), Gabriel Magalhaes (Arsenal), Ibanez (Al-Ahli), Leo Pereira (Flamengo), Marquinhos (Paris St-Germain), Wesley (Roma)
Midfielders: Andrey Santos (Chelsea), Casemiro (Manchester United), Danilo (Botafogo) Fabinho (Al-Ittihad), Gabriel Sara (Galarasaray)
Forwards: Endrick (Lyon), Gabriel Martinelli (Arsenal), Igor Thiago (Brentford), Joao Pedro (Chelsea), Luiz Henrique (Zenit Saint-Petersburg), Matheus Cunha (Manchester United), Raphinha (Barcelona), Rayan (Bournemouth), Vinicius Jr (Real Madrid)