Ngaihdam dil turin ZORO-in Tripura sawrkar a phut

Zo Re-Unification Organisation (ZORO) chuan Tripura sawrkar hnuaia hnalakna tur exam-ah Zofate hmusit zawngin zawhna leh chhanna siam a ni tih sawiin, ngaihdam dil tura an phut thu an sawi.
ZORO thuchhuak chuan, July 21 (Pathianni) khan The Tripura Tribal Areas Autonomous District Council (TTAADC) chuan sub zonal development officer (SZDO) hnalakna tur examination a buatsaih a. Question number 75-naah, ‘Sikam’ tih chu Tripura state-ah tute hnam nge, tih zawhna a siamah, a chhanna ‘Halam-Kuki’ tih a hmang niin a sawi.
‘Sikam tih hi Tripura-ah chuan tawngkam mawi lo, hnam inhmuhsitna tawngkam, hnam mawl, mi thah ching, hring ei hnam tihna a ni a. Tripura sawrkarin an state-a Zofate hmusit taka competitive exam a buatsaiha zawhna atana a hmang hi Zofate min hmuhsitnaah kan ngai a. Tripura sawrkar kan dem hle a, Zofate chungah ngaihdam dil turin kan phut a ni,’ a ti.
Kumin July 16-a Cachar district, Assam state-a kan Hmar thalai pathum, Assam Police-in lemchanna hmanga man a, rawng taka an that pawh an dem hle tih ZORO hian a sawi.
‘Hemi chungchanga kan unauten an thlavang hauha hma an lakna hi kan thlawp a. Assam sawrkara an thil phut zawng zawng tihhlawhtlin sak turin Assam sawrkar kan phut a ni,’ a ti.