Ni 100 inhlawhna tih danglam tum danah him lo tam tak awm – Congress party
Ni 100 inhlawhna tih danglam
tum danah him lo tam tak awm
– Congress party
BJP kaihhruai central sawrkarin ni 100 inhlawhna tia hriat, MGNREGA tidanglama a hming thlak bakah a kalphung thlak a tum chu a hmang tangkaitute tan bakah state ho tan a tha lo hle tih MPCC Legal Department chairman TT Zothansanga chuan a sawi.
MPCC Political Affairs Committee member ni bawk TT Zothansanga, ex-MLA chuan thuthar thehdarhtute a kawmnaah BJP kaihhruai sawrkarin kum 2005-a Prime minister Man Mohan Singh hoa ni 100 inhlawhna dan siam, tun thlenga India ram puma hman chu thiaha thlak a tum tih a sawi a. Kumin December 16-a Lok Sabha thutkhawmah a thlakna tur – Viksit Bharat Guarantee for Rozgar & Ajeevika Mission (Gramin) – VB GRAM R-Bill chu pharh a ni tih a sawi.
He ruahmanna hi India ram mipui tan thil pawi thlen theia an hriat avangin ram pumah Congress party chuan duhlohna an lantir tih a sawi a. Dan tharah hian thingtlangmite zalenna laksakin an dinhmun a tihniam tih a sawi a ni.
“Tunah hian ni 100 inhlawhnaa sum intum sem dan hi 90:10 a ni a, dan thar ruahmanna hian hmarchhak state leh union territory a ngaia a kal laiin, 60:40 angin state liante an kal tawh dawn a, hei hian nasa takin state te ho economy a nghawng dawn. Parliamentary Standing Committee-a ngaihtuah nawn kan phut a ni,” TT Zothansanga hian a ti.
Ni 100 inhlawhna hnuaiah khan mawhphurhna pumhlum central-in a la a, bill tharah hi chuan an mawhphurna hlip thenin state-ah mawhphurna rit tak a hlan then dawn a, hei hian ‘financial federalism’ a bawhchhe nasa tih a sawi bawk.
Dan ruahman tharah hi chuan, central-in a duh angin sum a ruahman anga, a duhna lai area a puanah chauh kalpuiin, criteria pawh a siam anga, a ruahman ang state-in a kalpui a ngai dawn tih MPCC Legal Department chairman hian sawiin, “Mi zawng zawng huap a nih loh pawhin dan anga sawisel theih a ni loang. State leh village council thuneihna a chhuh teuh dawn,” a ti.
Bill tharah hian hnathawh hun hi ni 100 atanga 125-ah a tisang a, thawh kim loh pawhin right anga claim theih a ni tawh dawn loa, state lian ho chuan 40% an tum theih loh tur thu an MP-te kaltlangin an sawi nghal tih a sawi a ni.