Ni 69 hnuah hri vei awm leh

Kuminah Covid-19 vei an awm nual a, kum chawhma lamah khan hri vei hriatchhuah thar an awm nual. Kum laihawlah a reh ta a, mahse tun hnaiah hriatchhuah thar an awm leh nual.
Ni 69 chhung hri vei hriatchhuah an awm loh hnuah, August ni 4-ah an awm leh a, a hnuah an awm chhunzawm bawk.
IDSP te’n an chhinchhiah danin, May ni 26 khan hri vei an awm a, a tuk atangin ni 69 chhung chu hri vei hriatchhuah an awm zui lo. A ni 70-naah an awm leh ta.
June leh July thla chhungin hri vei an awm lo a, August ni 4-ah mi pathumin an vei tih hriatchhuah a ni. Hemi ni hian sample 32 endik a ni. August ni 7-ah sample 24 endik niin hri vei hriatchhuah paruk an awm leh a, August ni 8-ah sample 16 endik niin mi pangain hri an vei tih hriatchhuah a ni leh.
August thla chhungin mi 14-in hri an vei tih hriatchhuah a ni tawh.
Kuminah hri vei hriatchhuah hmasak ber chu March ni 10-a mi a ni a, March thlaah hian mi pathumin hri an vei tih hriatchhuah a ni. April-ah a pung hluai a, April thla chhungin mi 40-in hri an vei tih hriatchhuah a ni. May-ah pawh a pung leh a, mi 57-in hri an vei tih hriatchhuah a ni. June leh July thla chhungin hri vei hriatchhuah an awm lo.
Nikum nena khaikhinin kuminah hri vei zat hi a pung ang reng a, nikum chhunga hri vei zat kha 40 niin, kuminah 114 a tling tawh.
Mithiamte chuan hri vei hriatchhuah an awm avangin covid-19 a hluar tihna a ni lo tih an sawi a, he hri hi Mizoramah a awm ngheh tawh avangin, hri vei hriatchhuah thar hi an awm fo tura ngaih a ni ve reng thu an sawi.
IDSP te’n an chhinchhiah danin, Mizoramah a tir atangin sample 19,98,959 endik a ni tawh a, mi 2,39,792-in hri an vei tih hriatchhuah a ni tawh.