Eiruk thubuai nei bibo zui Central Jail-ah dahlut leh

Mizorama eiruk thubuai nei, bail-a a chhuah laia a chin hriat loha bibo zui ta chu Delhi-a manchhuah leh a nih hnu ah Mizoram thlenpui a ni tawh a, Ningani khan Central Jail-ah dahluh a ni.
MAMCO (Mizoram Agriculture Marketing Corporation Ltd) hnuaia contract hna pek intiama sum inlaksaka cheng nuai 268 tihchingpen thubuaiah hetihlaia MAMCO managing director charge latu Lalremthanga leh business consultant anga a rawih Mustaqur Rahman te chu thiam loh chantir an ni a. Man an nih hnu ah interim bail-a chhuahtir an ni a, Gauhati High Court chuan an anticiptory bail an dilna chu a hnawl zui a, Lalremthanga hi chu man leh niin, Mustaqur Rahman hi a awmna chin hriat zui a ni ta lo.
Special Court (Prevention of Corruption) chuan 2022 December 22 khan Lalremthanga hi thiam loh chantirin, December ni 23 khan court hian kum 5 tang tur leh cheng nuai 15 chawi turin a lo hrem tawh a ni. Guwahati lam mi Mustaqur Rahman pawh hi court hian warrant of arrest tichhuak nghalin, amah man tumin thla hnih zet police-ten an lo zawng tawh a, tunhnai khan New Delhi-ah chhui thlengin Delhi Police-te puihna in man a ni.
Delhi-a tihfel ngaite tihfel a nih hnu ah Mizoram Police hian Ningani khan Aizawl an thlenpui a. Ningani vek khan Special Court (Prevention of Corruption) judge hmaah hruai a ni a. Judge hian a chungchang ngaihtuah chhunga judicial custody-a hren turin Central Jail-ah a thawn nghal a ni. Sawrkar laipui Ministry of Human Resources & Development hnuaia India ram state hrang hranga school din, Kendriya Vidyalaya School (KVS) chu Mizoramah pawh hmun hrang hrangah din niin, a din hna enkawl tur, implementing agency atan MAMCO hi hman a ni a. Kum 2010- 2014 inkar vela KVS sakna tura sum chingpen awm nia lang chungchangah MAMCO hotuten Mizoram sawrkar hnuaia Anti Corruption Bureau (ACB) ah 2015 December khan complaint an thehlut a. Hetih hunlaia MAMCO deputy manager (marketing), managing director charge latu ni bawk Lalremthanga chu contractor leh midang dang hnenah KVS sakna tur kaihhnawiha sum la a, tichingpena puh a ni.
ACB-a complaint thehluha a lan danin, Mizoram hmun hniha KVS project-ah MAMCO leh KCS inrem danah hnathawhna atana sum dah atangin zaa 7 chu MAMCO hian agency charge atan a chang ang tih a ni. Hetih hunlaia managing director charge latu hian a thuneihna hmangsualin contract hna awm tur changchawiin, contractor leh supplier mi pasarih hnen atangin cheng nuai 268 vel laa puh a ni a, heng sumte hi MAMCO account-ah lut loin Lalremthanga thurualpuinia hriat Mustaqur Rahman account-ah a lut a ni, tih a ni.