Nirmala Sitharaman-in interim budget pharh

Union Finance Minister Nirmala Sitharaman chuan interim budget pharhin engmah thil lian tham emaw tax relief emaw a awm lo va, chu chuan BJP ten Lok Sabha inthlanna neih mai turah chak tura an confident zia a pholang anga ngaih a ni a. Sorkar chuan Viksit Bharat tihhlawhtlin nan July thlaah full budget a pharh ang tiin Sirtharaman chuan a sawi.
Prime Minister Narendra Modi chuan Budget pharh hma ni chiahin July thlaah full budget an pharh tur thu a lo sawi tawh a. “Inthlan hma lawk chuan full budget pharh a rem lo va. Inthlan zawhah kan sorkar thar pian hunah kan pharh ang. Interim budget hi chu guideline mai a ni a. Kan ramin hnianghnarna a hmuh ka beisei tlat a. Mitin tan hmasawnna a thleng ang a, kan zinkawng chu i malsawmna in kan chhunzawm zel ang. Ram Ram” tiin PM Modi chuan a lo sawi tawh a ni.
Full budget ni lo mahse taxpayers te chuan inthlan kumah eng emaw relief a awm an beisei a. Budget pharh hma in Incom Tax pek ngai lo investment cap a ennawn dawn tih thawm te siam a ni a. Opposition leader te pawhin sorkar chuan populist announcement inthlan hma chiah a nih avangin a siam an ring bawk a. Mahse, Sitharaman budget pharh chu confidence zia pholanna leh inthlan zawh hnua full budget pharh inrinzia lanna zawka ngaih a ni.
Sitharaman chuan interim budget kaldan phung ang zuiin engmah tax lak velah pawh thlak danglamna a kalpui duh lo tiin a sawi a.
BJP te chuan budget pharh chu lawmawm an tih thu sawiin Union Home Minister Amit Shah chuan Prime Minister Modi-a kum 2047 a Developed Bharat vision chhunzawmna zel a ni a ti a. External Affiars Minister Dr. S Jaishankar pawin budget chuan ‘kum sawm chhung inthlak danglamna tarlangin, hmalam huna hmasawnna tur hmathlir a pe’ tiin a sawi bawk.
Union Minister Rajeev Chandrasekhar chuan tun hnai kum 10 chhunga Indian economy qualitative leh quantitative transpformation lanna tiin a sawi a. Union Minister leh BJP veteran Nitin Gadkari chuan ‘budget hian ram hmasawnna tichakin hna tam zawk a siam ang’ a ti thung.
Opposition leader te chuan engmah chinchhiahtlak awm lo an ti thung a. Samajwadi Party chief Akhilesh Yadav chuan BJP farewell budget tihsak thungin, “Mipui hmasawnna tur a nih loh chuan budget chu awmze nei lo a ni. BJP te hian kum sawm chhung anti-people budget an pharh tawh. He record hi a awm reng ang a chhan chu progressive government a piang dawn” tiin a sawi ve thung.
Congress MP Shashi Tharoor chuan budget speech tawi ber pawl tia sawiin, “Eng thil teh vak mah a awm lo. A ngai ang bawkin invaukhanna lam a tam a, a taka tihtheih a tlem hle. Foreign investment a sawia mahse nasa taka a tlakhniam a hai der bawk si. Confidence takin a sawi teuh nachungin figure hmuh tur a tlem hle” tiin a sawi bawk.
Prime Minister Narendra Modi thung chuan budget pharh chuan developed India pillar pali a tichak ang a ti a, chungte chu thalai, mirethei, hmeichhia leh loneitute an ni a ti. He budget hi India thlak danglam tur a ni a, ‘developed India by 2047’ bulthut a tichak ang tiin a sawi.
Pm Modi chuan interim budget ah thutlukna siam pahnih lachhuakin pakhat chu research and innovation tana Rs 1 lakh crore corpus fund dah leh start up te tana chhiah awl te a sawi lang a.
Hei bakah hian Capex atana Rs 11.11 lakh crore dah chu chhinchhiahtlak ti bawkin hei hian 21st century infrastructure mai bakah thalai te tan hna tau tet a siam dawn a ni a ti.
“budget hmangin Vande Bharat bogies 40,000 regular train a behtir theih tur siam a ni dawn a. He mi hmang hian khual zin ten nuamsa zawkin zinkawng an zawh thei tawh ang” tiin PM Modi chuan a sawi bawk a.
“Mirethei te tan thingtlang khua leh khawpuiah chenna in 2 crore kan sakbelh ang a, Lakhpiti Didis pawh 3 crore ah kan ti pung ang” tiin a sawi bawk.