Nitin no 1 in a pawi tho

Nitin tlem tlem zu in hian thatna a neih thu te pawh kan sawi tawh a, thatna a neih rualin that lohna pawh a nei tho. Mithiam ten zirchianna a neih hnuah hmeichhe tan nitin zu no khat in leh mipa tan nitin zu no hnih in hian small intestinal bacterial overgrowth (SIBO= ril tza natna hrik inthlahpung tihna a ni thei ang?) a siam thei a, chu chuan kawpuar, pumna, ek khal leh kawthalo te pawh a thlen thei niin an sawi.
He zirchianna atan hian damlo 198 te chart uluk taka zir a ni a, heng damlo te hi lactulose hydrogen breath testing (LHBT) tih a ni a, chuta tang chuan SIBO an neih leh neih loh hriat theih a ni. He test atang hian zu leh SIBO in kaihhnawih dan hi an hrechiang ta niin an sawi.
He zirchianna hi Mayo Clinic leh Dartmouth-Hitchcock Medical Center a mithiam te neih a ni a, zirchiannaa an hotu Scott Gabbard chuan, “Tlem tlema zu in leh SIBO inkaihhnawih dan zirchianna neih vawikhatna a ni a, tlem tlema kan zu in hian harsatna min thlen thei a ni,” a ti.
He zirchianna chungchang hi American College of Gastroenterology 76th Annual Scientific meeting, Washington, DC-a neihah an chhawpchhuak a ni.