Norway tan Haaland a vul

Ningani zan khan UEFA Nations League khelh chhunzawm a ni a, League B lamah Norway in 4-1 in Slovenia an hneh. Slovenia an hneh tum hian Erling Haaland chuan goal khat a thun a, Norway tan goal thun hnem ber a nihna a tihzau belh. Ningani zan hian Norway elpui lian Austria pawhin hnehna an chang ve bawk.
Norway hi Slovenia khel turin Stadion Stozice-ah an leng lut a, mikhual an nihna hmunah bul an tan tha hle. Norway tan hian Antonio Nusa chuan inkhel tan atanga minute lina lekah hmahruaina goal a thun nghal. Hma takah goal chhuah mah se mualneitu Slovenia an buai mai lova an si phurh pawh an sut har lo. Mualneitu tan hian Club lian zawkte pawhin lak tuma an hel Benjamin Sesko chuan minute 21-naah penalty atanga goal thunin an si phurh a sut.
1-1 a nih hnuin inkhel a hmuhnawm chhunzawm viau a, goal pawh a luh belh lawk thei lo. Goal a luh belh theih mai loh hnuin Erling Haaland chuan minute 45-naah Norway hmahruai nawn lehna goal a thun. Haaland hian Norway tan goal 35 a thun tling chiah a, kum 90 chhung zet Norway tana goal thun hnem ber lo ni tawh thin Jorgen Juve a siam chu goal hnihin a khum der tawh a, ram tan a chetha zui zel. Haaland hian Manchester City tan goal a thun thei viau a, club tan a chetthat rualin Norway tan pawh a chetha viau bawk.
Chawlhlawk hmaa goal hnih thun tawh Norway hi chawlhlawk hnu lamah an khel tha chhunzawm a, goal hnih an thun belh leh. Second half tan atanga minute lina lekah goal hmahruai thuntu Antonio Nusa chuan an goal thumna thunin an hmahruaina a tizau a. Hun tawp dawn hnaih minte 82-naah Jens Hauge chuan an goal lina a thun zui leh a, an chakna a nem nghet zui ta a ni.
League B, group 3-a inkhel dangah Austria chuan si hnih faiin mualneitu Kazakhstan an hneh a, group hmahruaitu an ni chhunzawm zel.
Austria tan hian Christoph Baumgartner chuan minute 15-naah hmahruaina goal a thun. An mualah goal chhuah hmasa zawka an tan hnuin Kazakhstan an chesual zui leh zat a, an player Aleksandr Marochkin chu minute 23-na lekah hnawhchhuah a ni. Tam zawk an nih hnu lawkah Austria tan hian Michael Gregoritsch chuan an goal hnihna a thun zui leh ta mai a, Mimualah si hnih faiin an chak zui ta a ni.
Group 3-ah hian khelh Austria leh Norway ten vawi nga ve ve khel tawhin point 10 an hmu dun mek. Goal difference-a tha zawk Austria chu Group hmahruaitu an ni a, Norway hi pahnihnaah an awm mek. Pathumnaa awm Slovenia in point 7 an hmu mek a, table mawngphaha awm Kazakhstan in point khat chiah an la hmu.