Nou Camp-a Messi hruaikirlehna campaign!

Nou Camp-a Messi hruaikirlehna campaign!
Spanish media, Barcelona fans leh manager ngeiin ‘bring back Lionel Messi’ campaign an tih mai chuan a ni telin thawm a neilian chho zel a, Paris St-Germain lama contract hmang zo mai tawh tur a nih laia tun thlenga inremna thar ziah lam la awn lo a nih bawk avangin kumin nipui thawt lai hian Nou Camp-ah a kir leh ngei dawn nia ngaihna a piang nghet deuh deuh!
He mi chungchanga BBC Sport column changtu pakhat Guillem Balague thu leh hla behchhanin Spain leilunga Argentine hruaikirleh tumna campaign chungchang thlir zui teh ang.
Nou Camp mi leh sa zawng zawng chu an fahrin ropui ber hruaihawleh tumna kawngah hian an lungrual niin a lang a, Barcelona lama decision-maker an tihte pawhin chu chu lungkham lian berah an nei chho mek a, season hnih liamtaa an sum dinhmun ena Lionel Messi kawl zo loa inngai president Joan Laporta ngei pawh an fa chuam laklet tumna kawngah hian a phusa berah a tang chho leh tawh!
Kum 35 mi Argentina forward hian game 778 khela goal 672 thun tlingin Barcelona player awm tawh zawng zawng zinga he club tana goal khung hnem ber a ni mek a; kum 30 a pelh hnuah a club vawn chhun ni reng thin Catalan team chhuahsan mah se Europe mai ni lo Fifa world cup thlengin football level sang ber-ah pawh a tha ber a la ni thei tih a lantir zo chiah a; PSG lamah an awh ber Uefa Champions League trophy a hawnsak mai theih bik loh avangin France ram chhuahsana a ropuina muala kirleh hi amah pawhin a duh nia ngaih ngheh a ni.
Tunhnaia Spanish media-te tarlan dan phei chuan Messi-te nupa hian Barcelona khawpuiah an fate sikul luhna tur an hauh fel tawh an ti a, Nou Camp hian ‘homecoming’ a lawm hnai nia ngaihna a lian deuh deuh!
Tarlan tawh thin angin, season kal lai tawp rual hian PSG-a Messi contract neih lai a tawp ve leh tawh dawn a, France rama a cham zui zelna lam hawi chetna thawm hriat tur a awm eih lo a, chutih laiin Barcelona lamin an superstar hi hruaihaw leh an duh tih khawvel hriatah an puangzar tawh a, Catalan supporter-te ‘dream’ lian ber ni mek hi a puitlin theih dan kawng club lam leh La Liga thuneitute thlengin an ngaihtuah tih hriat a ni!
Messi hruaihaw a khirh dawn em?
Hripui vanga sum lama harsatna tawk Barcelona hian an mi chhawrte kum khat hlawh (wage bill)-ah euro maktaduai 600 (£531m) vel an senral ziah a ngai a, sum lama inkaihhruaina khirh tak avang leh club sum dinhmun siamtha turin an wage bill hi euro maktaduai 200 (£177m) tala an tihhniam a ngai a, chutiang dinhmuna an din laia khawvel footballer hlawh hnem berte zinga mi hlawh pek leh tum lai tak hi Messi hruaikir tura an chetchhuah nghal chuk chuk theihlohna chhan lian pakhat a ni a, dan ang thlapa Messi lei tumna an kalpui mai theih loh chhan pawh sum lama an dinhmun vang hi a ni.
Tun dinhmunah an player rualkhat – Gavi, Araujo, Marcos Alonso leh Sergi Roberto tih angte pawh contract thar an la hlui thei lo a, season thar atan contract renew bakah squad thuamchakna lam kawng pawh an la hawi thei lo!
Chu chu an dinhmun a nih laia Europe club lian dangte pawhin an la iai loh, a hlawh sang tak pek harsatna avanga club nazawng tana beisei ngam loh la ni reng Argentine chhawr nawn leh tum chu Nou Camp club tan pawh thil awlsam a ni bik lo a, hei vang tak hian La Liga lamah Messi hruaikir tura ruahmanna (plan) felfai leh pawmawm tak an thehluh a ngai dawn.
Club-te sum hman dan khuahkhirh kawnga thuneitu La Liga lamin an pawm theih tur plan-ah chuan an player chhawr laite hlawh tihhniam belh leh han tih ang chi te, wage bill tihniam tura player hralh then tih te, an sengluh thar tur pawh free transfer lam zel tihte an bilh tel a ngai dawn a, hei vang hian tun dinhmunah an player chhawr lai thenkhat chu an contract tihtawp chungchang thlengin an ngaihtuah tan tawh nghe nghe!
La Liga lam pawmpui theih tura kawng an sial zawh vek hunah chauh Barca hian Messi tela player thar transfer market lam an hawi thei chauh ang.
Harsatna dang
Nou Camp thuamthat avangin a lo berah pawh November 2024 thleng Montjuic lama Olympic Stadium hluiah Barcelona hian awmhmun an khuar a ngai dawn a, an khelmual lian an chhuahsan man ringawt pawh hi a to talh talh dawn hle a, ticket manah kum khat chhungin euro maktaduai 55 (£49m) tehreng an hloh rih a ngai dawn!
Messi awn lam ve thung
Kum 18 dawn inpui bera a lo neih tawh Nou Camp lam ngeia kirleh hi Argentine pawhin a hreh lo mai ni loin mipa naupang mai a nih lai atanga a khawsakna khawpui Barcelona hian a lung a la len reng tih hriat theihin a khawsa zauh zauh a, naupang, nupui fanau nei tawh, chhungkaw pa leh footballing legend a nihna zawn zawng zawng atangin a chawrchhuahna leh a engkim petu Catalan club thuam inbel leh hi a chak tih phat rual a ni lo.
A khelhpui thin Barcelona manager Xavi nen hian a hmalam hunah thuk taka inzawma ngaih an ni tel lehzel a, Spanish coach hi Messi tan a pawimawh a, chu inzawmna chu sum chungchang ai pawha pawimawh a ni.
Hei hi thil awmdan a nih mek laiin a team-mate hlui hian Messi kirleh theihna chance hi a dahsang (90%) hle a, Barca thuam a inbel leh a nih chuan a khelhtirna tur leh a formation thlakdanglam dan tur thleng thlengin a sawichhuak tawh a; chu hun a thlen tikah chuan Messi position atan 4-3-3 formation-ah offensive midfielder emaw 4-4-2 top of the diamond tihte a sawiri der tawh!
Barcelona baka Messi kal theihna awm an sawirik dang leh chu Saudi Arabia lam niin, kumkhata euro maktaduai 400 (£354m) tehreng hlawha Cristiano Ronaldo nen league thuhmuna khelh dun leh chungchang a ni!
Superstar uaithla lamte kal fo thinna Major League Soccer (MLS) lam atang pawhin thawm hmahruai hmui lutuk tak mai a hre tawh tih hriat a ni lehzel a, thil chiang lo rau rauah season thara PSG thuam a inbel tawh loh hmel lai hi a chiang ta berin a lang!