Number one ranking luahkir tur Bopanna

Thawhtannia men’s doubles tennis ranking thar an tarchhuah huna No 1 ranking luahkir leh tur Rohan Bopanna leh a Australian partner Matthew Ebden chuan Ningani khan Miami Open men’s doubles final an luhna kawngah straight-set hmangin Marcel Granollers leh Horacio Zeballos an paltlang a, zanin final-ah Ivan Dodig of Croatia leh American Austin Krajicek tangdun an hmachhawn ang.
Dodig leh Krajicek inkawp hian semi-final dangah 6-4, 6-7(7), 10-7-in German pair Kevin Krawietz leh Tim Putz an hneh.
Australian Open winners Bopanna leh Ebden tangkawp hian thlan tla hman mang loin last four an paltlang a, Spaniard Granollers leh Argentine Zeballos tangdun lakah 6-1, 6-4 hnehna nuamsa an sualchhuak.
Dubai Championships quarter-final paltlang zo lo leh Indian Wells Masters round of 32 pel zo loa an khawsak avang khan Bopanna hi doubles ranking-ah tlahniamin pahnihnaah a chhuk a, mahse, Miami Open semi-final a paltlang leh theih tak avangin karleh Thawhtanni hian ranking-a a sang ber a luahkir leh dawn a ni.
Australian Open trophy a chawi hnu khan kum 44 mi Bopanna hian ATP ranking bouble bikah World No.1 nihna a chang chho ta kha a ni a, mipa doubles ranking-a number one ni thei upa ber a ni nghe nghe.
Bopanna tan Inrinni final hi ATP Masters 1000 final tum 14 a khelhna tur ni tawhin, Miami bikah erawh a final luh vawikhatna a ni a; a career pumpuiah chuan ATP Tour level final tum 63 a khelhna tur chiah niin, doubles title 25 a la tling tawh.
Tun hi Bopanna leh Ebden inkawpin ATP Masters 1000 final vawinga an khelhna tur a ni bawk.
Veteran Rohan Bopanna hian hlawhtlinna mi chan zen zen loh sawi tur nei bawkin, Indian player zingah Leander Paes tih loha ATP Masters event pakuaa final lut kim vek thei pahnihna a ni.