Nupa nunah hmangaihna a tawk mai lo

Nupa inthen an tam ta hle a, milar zingah phei chuan inthen hi eng he huah an ngai lo emaw tih hial tur a ni ta. Nula leh tlangval an intawng a, an inhmangaih a, an innei a, hlim takin dam chhungin an awm dun ta a, tih hi thawnthuah bak a taka hmuh tur a vang ta hle. Inthen chu a common ta riau a, inthen chhanah thil chi hrang hrang kan mawhpuh zel bawk. Chutiang boruakah chuan relationship lama mithiam ten inthen mai lo a, hlim taka innei reng turin hmangaihna ringawt a tawk lo niin an sawi a, thil pawimawh leh hriattur tul an tih te kan rawn tarlang e.
1. Cheng ho ngai lo kan cheng ho a, TV programme en duh zawng a lo dang a, chawhmeh siam dan leh ei leh in hunbi thlengin a danglam a, faina chungchanga kan invawn dan leh kan toilet habits thlengin a danglam a, chutiang hunah chuan kan insiamrem theih thin loh avangin nupa karah harsatna tam tak a awm phah thin. Chuvangin inneih hmain kan chen hona tura thil pawimawh te inhrilh hriat a, duh dan kan neih leh chin dan kan neih te inhriat tawn a pawimawh hle.
2. Kan taksa landan pawh ngaihpawimawh a tul khawp mai. A hmaa nalh taka awm thin nupui pasal inneih hnuah bawrchhawr tak tlat te, a hmaa inkhaithli zaih thinin dul kan tikiar a, kan thau ta luah mai te hian a hmaa kan inhip tawnna boruak kha a tichhe thei tlat a, hei vang hian relationship counsellor te chuan nupa chu ei leh in lamah fimkhur a, exercise te pawh regular taka la turin an rawn fo thin. Incheina lamah pawh mahni phak ang tawka nalh taka inchei thin tur a ni a, miin kan kawppui te nalh an tih thu an sawi te hi ngaihthlak a nuam duh riau a nia.
3. Hun awla eng emaw thil hlimawm tih dun thin te a that ang bawkin hna thawh dun thin pawh a tha hle. Sum siam zawnga hna thawh dun a, kan theihna leh thiamna te hmang dun theia awm te hian nupa inkar a phuar nghet thei.
4. Mahni intheihnghilh loh a pawimawh. Nupa nun chu a pawimawh a, dah hmasak ber tur a ni, chutih rualin mahni intheihnghilh thaka kan kawppui te tana kan inpek hian a tha hle tura kan ngaih laiin kawppui te tan an nun ticheptu kan lo ni reng thei a, nakinah phei chuan keimahni tak pawhin nin chin neiin kan buai phah zawk hlauh thei. Chuvangin, a chang changa mahni nuam tih zawng leh tih chak zawng te tih ve fo tur a ni a, a khat tawka thiante nena inkawm hona chance neih fo te pawh a