Nursing home kangah mi 10 in nunna chan

Spain khawpui pakhat Zaragoza bula nursing home-a kangmei chhuak vangin mi 10 an thi a, midang tam takin hliam an tuar.
Kangthelhtute chuan kangmei a chhuah veleh hian thelh mih hna an thawk nghal a, hun rei lote chhunga an thelh mih theih thu an sawi.
Zirtawpni zing dar 5 vel khan khawpui hmarchhak lam atanga kilometer 28 vela hla Villafranca de Ebro-ah kangmei a chhuah thu hi sawi a ni a, official te an thlen chuan mi pahnih dinhmun a lo tha lo hle hman tawh a ni.
Tualchhung media te chuan he nursing home-ah hian mi 82 an awm niin an sawi a, kangmei chhuah chhan hi an hre thei rih lo a, an chhuichian mek a nih thu sawi a ni.
Villafranca de Ebro mayor Volga Ramirez chuan thuthar thehdarhtute a hrilh danin, kangmei vanga nunna chan an tam chhan hi meikhu a nasat vang a nih a rinawm thu a sawi a, meikhu hian a bawh hneh em avangin nunphung a buai nasa hle nia a lan thu a sawi.
Tunah hnaiah Spain hian chhiatna an tuar nasa hle a, kar rei vak lo liamtaah khan tuilian nasa tak tuarin, mi 200 chuangin nunna an lo chan phah tawh bawk a ni.