Observer-in district inbuatsaih dan en

Observer-in district inbuatsaih dan en
Electoral roll special summary revision neih turah electoral roll observer Dr Lalrozama chuan Thawhtanni khan Mamit a tlawh a, roll revision atana an district inbuatsaih dan a enpui.
Election Commission of India duhdan angin roll revision neih mekah khawtlang hruaitu, tlawmngai pawl leh official-te thawhhona a tha em, roll-a chuang tur dik takten an hriat duh leh mamawh official-te hnen atangin an hre tha em tihte chu ECI-in a ngaihpawimawh avanga tlawh a ni tih electoral roll observer hian a sawi a. Roll revision neih chhungin India khua leh tui dik tak, roll-a chuang turte an luh ngei theihnan ngaihven turin a chah.
District election officer Lalnunfela Chawngthu tarlan danin, Mamit district-a Assembly bial pathum atanga form 6/7/8 dilna lut tawhah, form 6-ah Hachhek atangin 519, Dampa 714 leh Mamit 760 an dawng tawh a. Form 7 ah Hachhek 244, Dampa 238 leh Mamit 271 lut a awm. Form 8 ah Hachhek 339, Dampa 428 leh Mamit 519 a lut a ni.
Special Summary Revision of Photo Electoral Rolls 2025 neih mekah hian hming thunluh, paih ngai leh siamthat ngai tan kumin October 29 atanga November 28 chhung hun hawn a ni a. Form lut hi ERO/AERO ten enfiahin, December 24 ralhmain chinfel hman tur a ni. Final roll hi 2025 January 6-a tihchhuah tum a ni.
Mamit district-ah hian vote nei mipa 32886 leh hmeichhia 32307, an vaiin 65193 an awm mek.