Ohio-a kût hmannaah mi 12 kap, a kaptu zawng mek

US laili thlang lam state, Ohio-a Toledo-a kût hmanna bula mi 12 vel kaptu chu police-in an zawng mek tih an sawi.
Toledo Police Department chuan mi 10 chu ‘an dinhmun a tha a, pahnih erawh an dinhmun a tha lo hle’ niin an sawi.
Inrinni tlai dar 05:37 (India-a Pathianni zing dar 03:07) vel khan Old West End Festival hmanna bulah silai hmeh puah a nih thu an dawng tih an sawi.
Toledo Deputy Police Chief Joe Heffernan-a chuan mi pahnihin silai an kap niin a lang a, ‘an inkap tawn pawh a ni thei’ tih a sawi.
Online-a video a tihchhuahah chuan silai ri leh mipui tlan leh au chuah chuah lai a lang.
Silaimu tuarte hi kum 16 leh 61 inkar an ni a, Toledo Mayor Wade Kapszukiewicz-a chuan a hmain tual chhung chanchinbu, WTOL 11 hnenah an vai hian an dam chhuak vek tura ngaih an nih thu a lo sawi tawh a ni.
Thil thleng hmutu, Tito Aguilar-a chuan CBS News hnenah ei tur a order laiin ‘kumtlinglo’ pawl khatin thalai dang an beih lai a hmu tih a sawi.
Aguilar-a chuan a phone-ah record a, chumi hnuah silai ri a hriat thu a sawi a. A tlan sawn zui niin a insawi a, a tawpah a thiante zawng turin a kir leh a, silai hmeh puah vanga hliam tuar nia lang mi eng emaw zat a hmu tih a sawi.
Police Lt Dan Gerken-a chuan tharum thawhna a thleng chuan a timangang hle tih a sawi a. “Mi 12 kah an ni a, hei hi ka hmuh tawha a tam ber a ni a. Tharum thawhna hmun tam takah ka kal tawh a, tun hi a nasa ber a ni,” tiin thuthar thehdarhtute a hrilh.
Gerken-a chuan police-ten a tuartute leh hmutute an kawm a, thlalaknaa lo lakte an en fiah mek tih a sawi a. Mipuite puihna a dil bawk.
Old West End Festival hi ni hnih chhung awha live music, food market, beer garden, in tour, bazar leh thil dang tam tak nena lawm thin a ni.
Police-te chuan chhuinaah hian Delaware Avenue leh Robinwood Avenue pawh an huam a. Festival website-a map chuan a inkar kawngpuiah hian rimawi leh ei tur hmun a awm tih a tar lang.
Online-a video dang tihchhuahah chuan hlanga mi pahnih an zawn lai a lang a, hliam tuar eng emaw zat chu phul hmunah an mu tlar tih a lang bawk.