Mizoram sawrkarin petrol leh diesel-a chhiah lak a tih dan leh cess a lak thar tur pahnih chu mirethei zawkte leh kuthnathawktute tawrhna tur a ni tiin, Congress Thalai chuan chhiah tihsanna tur hriattirna hi Nilaini khan an hal.
` Congress Thalai Hqrs. hian Mifoed Petrol Pump, Treasury Square bulah duhlohna hi an lantir a. Taxtation minister-in petrol leh diesel atanga VAT tihpunin a nghawng chungchangah Mizoram tana tha ber tur sawrkarin a ngaihtuah nia a sawi leh, a man chu sang viau angin lang mah se, kum hnih kaltaa petrol leh diesel man aiin a la hniam nia a sawi chu thil zahthlak tak a ni , tiin, a nihna takah chuan Mizoram chu hmarchhak state zinga oil man sanna ber state a ni zawk tih an sawi.
Oil chu essential commodities zinga pawimawh, thingtlang lamah phei chuan loneituten leilet leh huanah tangkai taka tui lak nan leh lei lehna khawl atana an hman; small scale industries zingah electric power that tawk lohnaah phei chuan diesel hmang thingzai khawl, buh her khawl adt. a rem rema hman a ni tih an sawi.
Lirthei neitu maiin an tuar dawn loa, mi harsa te te, lirthei neiloten an tuar dawn tih Congress Thalai hruaitute hian sawiin, ‘Maxi cab, taxi, bus chuan man thlengin a nghawng dawn. Board chairman hrang hrang leh adviser to CM tam tak, political appointment-a phuahchawpa nihna inpek leh hlawh uchuak taka tipung vak vak lo se, miretheite tawrhna chhiah tihsan vak vak hi a ngai loang,’ an ti.
Taxation minister-in chhiah tih san chungchang a sawifiahna leh mipui hriatthiamna a dil chu ZPM sawrkarin nasa taka mipui min rawk hnua insawi mamna maiah an ngai tih sawi bawkin, ‘Buhfai man an ti sang a, chhiah nasa takin an ti sang leh a, parking fee pawh nasa taka tisangin sahuan luh man thlengin an tisang a, mipui rawk theihna tur zawng zawngah an rawk mek a ni,’ an ti.
Oil man tihsan hriattirna hal Rethei zawkte tawrhna tur a ni – Congress Thalai
Get real time updates directly on you device, subscribe now.
Next Post