Old Age Home neih rel

Lawngtlaia district bawrhsap leh tlawmngai pawl hruaitute thukhawm chuan enkawltu nei remchang lo kum upate awmna tur Old Age Home neih dan tur an ngaihtuah.
Bawrhsap Joseph H.Lalramsanga hoin Lawngtlai district-a tlawmngai pawl hrang hrang hruaitute chu Nilaini khan an inkawm a. Central Young Lai Association, Lai Women Association, Lai Upa Pawl, Mizoram Upa Pawl leh Mizo Hmeichhe Insuihkhawm Pawl an tel.
Bawrhsap chuan MLA inthlan hlawhtling tak kalpui a nih theih chhan pawimawh tak chu Lawngtlai district-a tlawmngai pawl hrang hrang hruaitute inpekna vang a ni, tiin, thawhhona tha tak hnuaiah buaina leh harsatna liantham awm loin polling station 181-ah inthlan kalpui a ni tih a sawi. Kum lama upate leh pianphung harsatna nei, polling station pan kawnga harsatna neite tan, a tum khatna atan home voting buatsaih a nih thu sawiin, zau leh huam kim zawka kalpui chhunzawm turin hma lak a ni dawn tih a sawi a ni.
Inkawmnaah hian electoral roll rintlak leh felfai buatsaih kawnga thawh ho dan tur, kum upate tan bawrhsap pisa bula an building chu chuankai nuam lehzuala siam dan tur, Old Age Home neih nana hmalak dan turte sawi ho a ni a. Raltlan chhawmdawlna kawnga thawh ho dan tur an sawi bawk.