Wimbledon khelh zawh tak lamah inlan thei lo mah se hun rei tak hliamin a bawhbeh reng Rafael Nadal chuan kumin May thla hnu lama a vawikhatna atan Thawhtanni khan inelna khelmual a lut leh tan a, Bastad khuaa Swedish Open men’s doubles match-ah a kawppui Norwegian Casper Ruud nen first round an paltlang a, Paris Games-a Olympic medal awrh a tumna kawngah mittlung takin inbuatsaihna hmasa a kalpui mek.
|um 22 zet Grand Slam champion ni tawh Nadal leh Ruud tangdun hian 6-1, 6-4-in Swedish clay-ah second seeds Guido Andreozzi leh Miguel Reyes-Varela thawkdun an hneh a, rawqlthar kum 19 mi lek a nih lai kum 2005-a singles title a lak hnuah tun hi tennis inelna level hniam zawk ATP 250 event-a a chhuah leh vawikhatna chiah a ni nghe nghe.
Tarlan tawh thin angin, clay-court specialist Nadal hian Paris khuaa Olympic tennis inelna a tinzawn avangin Wimbledon kha a hawisan a, record siama grand slam trophy 14 tehreng a lakna khelmual Roland Garros-a khelh tur Olympic atana inbuatsaihna atan tournament hniam zawk pan a thlang ta zawk a ni.
Kum 38 mi ni ve ta Spaniard chuan hnehna an chan hnua court chhunga an kawmnaah a khelh danah mimalin a hlim hle tih a sawi a, match tha tak khel thei nia a inngaih thu sawi chungin Norwegian singles world number nine nen khan an vawikhat tandunna ni mah se an khel the hlea a ngaih thu leh kum 20 dawn liam hnua Swedish Open a khel leh thei chu a hlim hle tih a tarlang tel.
Nadal hian Bastad khaw tournament-ah hian singles pawh a khel dawn a, first round-a a hmachhawn tur hi Swedish great Bjorn Borg Leo Borg a ni nghe nghe.
Nadal hian kum 2008 khan Olympic singles gold medal awrhin, kum 2016-ah Olympic doubles gold a hlapchhuak leh a, kan hma lawk Paris Games-ah hian French Open leh Wimbledon champion lai Carlos Alcaraz nen doubles-ah an inkawp dawn a, hliamin a tibuai lo a nih chuan Spaniard pair hi ram dang tan tawrhhlelhawm ve tak tur an ni ang!
Olympic atana inbuatsaih mek Nadal
Get real time updates directly on you device, subscribe now.
Next Post