OP-a, Rintea & Muanpuia ‘Isu I Hnen Ka Rawn Pan E’

Mizo rimawi khawvela zaithiam leh guitarist hming dai tawh lo tur pathum, Tribal Power frontman OP-A, Dreamhunter vocalist thin Muanpuia leh Albatross vocalist thin Rintea bakah heng band pathuma guitarist theuh David Z Hmar (Dreamhunter), Hmingpuia (Albatross) leh VL-a (Tribal Power) ten ‘Isu I Hnen Ka Rawn Pan E’ tih hla an record-ho chu a music video vawiin hian en theihin an tichhuak dawn ta a, YouTube lamah pawh en theihin an dah chhuak nghal ang.
‘Isu I Hnen Ka Rawn Pan E’ tih hla hi OP-a phuah niin, Harvest Ministry hunlaia a phuah tawh kha a ni a, tun tumah hian Rintea hmalaknain an record ho niin David Z Hmar chuan a sawi a, “Rintea hmalakna a ni deuh ber a, he hla hi a duh a, keipawn ka duh a. Rintea hian vocalist ho leh guitarist te hi min sawm khawm a ni deuh ber,” a ti. A music track eraw Ephraim-a siam niin, a video hi Mawitea kutchhuak a ni ve thung.
David Z Hmar chuan Tribal Power frontman OP-A chu entawn tlak a tih thu sawiin, “A kum te ngaihtuahin a la zaitheiin, a aw ngaihthlak a la nuam em em reng a. Kum 60 chuang tawhah hetianga tha taka a la zai thei hi Mizo zaimi te tan a entawn tlak ka ti a, role model a tling kawp mai,” a ti.